Prezıdent óńdeý salasyndaǵy ınvestorlardy alǵashqy 3 jylda salyqtan bosatýdy usyndy
«Geologııalyq barlaý salasy erekshe nazar aýdarýdy qajet etedi. 2018 jyly mıneraldy shıkizat bazasyn tolyqtyrý maqsatynda taýken sektoryn basqarý baǵytynda jańa zańnama qabyldandy. Alaıda, ol tolyqqandy jumys istep kete almady. Saldarynan resýrstarǵa baı elimizde mańyzdy geologııalyq jańalyqtar ashylmaı keledi», - degen Qasym-Jomart Toqaev jaǵdaıdy shuǵyl túrde ózgertý kerektigin eskertti.
«Taýken sektoryn basqarý júıesin qysqa merzimde jańǵyrtý qajet. Kóptegen elderde salanyń negizgi qozǵaýshy kúshi jeke kompanııalar bolyp otyr. Sondyqtan iri jeke menshik ınvestıtsııalardy tartý salanyń áleýetin ashýǵa sheshýshi dárejede kómektesedi. Ol úshin ıkemdi retteýshi jáne fıskaldyq jaǵdaılar qajet», - dedi Prezıdent.
Memleket basshysy geologııalyq zertteýdi óz qarajaty esebinen júzege asyratyn ınvestorlar jer qoınaýyn paıdalanýǵa basym quqyq alýy qajettigin atady.
«Keshendi memlekettik saraptamany engizý jáne protsesti tolyq tsıfrlandyrý arqyly jobalardy maquldaý merzimderi men rásimderin eki ese qysqartý qajet. Úkimettiń mindeti – 2026 jylǵa qaraı geologııalyq-geofızıkalyq zertteý aýmaǵyn qazirgi 1,5 mıllıonnan 2 mıllıon 200 myń sharshy shaqyrymǵa deıin jetkizý. Basym mindetterdiń biri «jańa munaıǵa» aınalǵan sırek metaldardyń ken oryndaryn ıgerý bolýǵa tıis. Osy salada óz áleýetin iske asyra alatyn elder búkil álemniń tehnologııalyq ósim baǵdaryn aıqyndaıdy. Jyl sońyna deıin biz salany damytý týraly keshendi paıymdy ázirleýimiz kerek. Óńdeý ónerkásibin qoldaý úshin sheteldik jáne otandyq ınvestorlardy alǵashqy úsh jylda salyqtar men basqa da mindetti tólemderden bosatý qajet. Bul óńdeýshi ındýstrııaǵa eleýli serpin berýi tıis qaǵıdatty másele», - dedi Qasym-Jomart Toqaev.
Memleket basshysy bul jolǵy Joldaýyn «Ádiletti Qazaqstannyń ekonomıkalyq baǵdary» degen taqyryppen jarııalap otyr.
Buǵan deıin jazǵanymyzdaı, Parlament palatalarynyń birlesken otyrysyna depýtat-mınıstrlermen birge eńbek adamdary da jınaldy.