Prezıdent oblys jáne aýdanishilik joldardy salýdy tapsyrdy

ASTANA. QazAqparat - 2020 jyldan bastap oblysishilik, aýdanishilik joldardy salý máselesine jiti nazar aýdarý qajet. Bul týraly búgin Úkimettiń keńeıtilgen otyrysynda Elbasy Nursultan Nazarbaev aıtty, dep habarlaıdy QazAqparat tilshisi.

Otyrysta QR Indýstrııa jáne ınfraqurylymdyq damý mınıstri Jeńis Qasymbek «Nurly jol» baǵdarlamasy aıasynda Ortalyq-Ońtústik, Ortalyq-Batys, Ortalyq-Shyǵys joldaryndaǵy qurylys jumystary 2020 jyly tolyǵymen aıaqtalatyndyǵyn aıtqan edi. Osy rette Elbasy Nursultan Nazarbaev «Nurly jol» baǵdarlamasy aıaqtalǵannan keıin birden oblysishilik, aýdanishilik joldardy salýǵa oıysý kerektigin eskertti.

«Bul eń basty másele. Adamnyń úıine deıin jetkendi jol dep esepteımiz. Jalpy, jol elimiz úshin, ekonomıkamyz úshin óte mańyzdy», - dedi QR Prezıdenti.

Jeńis Qasymbek QR Prezıdentiniń óńiraralyq ınfraqurylymdy júıeli damytý tapsyrmasyn oryndaý maqsatynda ótken jyldan bastap jergilikti jol jelilerin jóndeýdi qarjylandyrý tepe-teńdik negizde 2 ese ulǵaıtylyp, 150 mlrd teńgege deıin jetkizilgenin aıtty.

«2025 jylǵa qaraı jergilikti joldardyń 85 paıyz jaqsy jáne qanaǵattanarlyq jaǵdaıda bolady dep kútilýde», - dedi mınıstr.