Prezıdent OA elderin Qazaqstan – Túrikmenstan – Iran temirjolyn belsendirek paıdalanýǵa shaqyrdy

NUR-SULTAN. QazAqparat – Memleket basshysy Qasym-Jomart Toqaev Ortalyq Azııa memleketteri basshylarynyń IV Konsýltatıvtik kezdesýinde aımaq elderin «Qazaqstan – Túrikmenstan – Iran» temirjolyn belsendirek paıdalanýǵa shaqyrdy, dep habarlaıdy QazAqparat tilshisi.

«Óz tarapymyzdan áriptesterimizdi «Qazaqstan – Túrikmenstan – Iran» temirjolyn belsendirek paıdalanýǵa shaqyramyn. Bul – Shyǵys Azııa men Parsy shyǵanaǵyndaǵy elderdiń arasyn jalǵaıtyn eń qysqa jol. Jýyqta Iranǵa jasaǵan saparymda Qazaqstannan Túrikmenstan men Iran arqyly Túrkııaǵa jús tasıtyn konteınerli poıyz iske qosyldy. Bul logıstıkalyq sheshim 6 myń shaqyrymnan asatyn joldy 12 kúnde eńserýge múmkindik beredi», - dedi Qazaqstan basshysy.

Sondaı-aq, Qasym-Jomart Toqaev Ortalyq Azııa elderi Taıaý Shyǵys pen Eýropa elderiniń naryǵyna Qazaqstannyń Aqtaý jáne Quryq porttary arqyly shyǵa alatynyn atap ótti.

«Bizdiń elderge óz aramyzdaǵy kólik kommýnıkatsııasyn damytý máselelerin de umytýǵa bolmaıdy. Qazirgi tańda biz Ózbekstanmen belsendi áriptestik ornatyp jatyrmyz. «Darbaza-Maqtaral» temirjol jelisin iske qosý arqyly beketterdiń ótkizý múmkindigin 2 ese arttyramyz, bul júk tasymalynyń ýaqytyn 1,5 ese qysqartady. Sondaı-aq, «Túrikmenbashy – Qaraboǵaz – Qazaqstan shekarasy» baǵytyndaǵy avtojol qurylysynyń jobasyn da qoldaımyz. 2025 jyldan bastap «Jańaózen-Túrikmenstan baǵytyndaǵy avtomobıl jolynyń kúrdeli jóndeý jumystaryn bastaý josparlanyp otyr», - dedi Prezıdent.

Aıta keteıik, Qyrǵyz Respýblıkasynyń Sholpan-Ata qalasynda Ortalyq Azııa memleketteri basshylarynyń IV Konsýltatıvtik kezdesýi ótip jatyr.

Jıynǵa Qazaqstan, Qyrǵyzstan, Tájikstan, Túrikmenstan, Ózbekstan kóshbasshylary qatysýda.

Buǵan deıin Qazaqstan Prezıdenti Qasym-Jomart Toqaevtyń Qyrǵyzstannyń Sholpan-Ata qalasyna barǵanyn jazǵan bolatynbyz.