Prezıdent naqty ári keshendi jospardy aıqyndap berdi - Emın Askerov

ALMATY. QazAqparat - Green Tal sheberhanasynyń jetekshisi Emın Áskerov Qazaqstan Respýblıkasynyń Prezıdenti Qasym-Jomart Toqaevtyń Joldaýyna qatysty pikir bildirdi, dep habarlaıdy QazAqparat tilshisi.

Onyń aıtýynsha, Prezıdent pandemııadan keıingi kezeńde eldi damytýdyń naqty mindetterin aıqyndap berdi.

«Memleket basshysy pandemııadan keıin 10 jylǵa sozylýy múmkin qıyn kezeń týraly aıtty. Joldaýda saıası, áleýmettik, ekonomıkalyq ósýdiń naqty qadamdary kórsetildi. Ásirese, saıası modernızatsııany atap ótkim keledi. 2024 jyly aýdan ákimderiniń saılaýy ótedi. Múmkindigi shekteýli jandarǵa kvota bólinedi. Meniń oıymsha, bul óte jaqsy kórsetkish bolady. Eń tómengi jalaqy sheginiń ósýi endi 60 myń teńgege teń bolamaq. Bul da mańyzdy»,- deıdi ol.

GreenTAL əleýmettik sheberhanasynyń basshysy, áleýmettik kásipker Emın Askerov muǵalimderdi qoldaýǵa qomaqty qarjy qarastyrylatyny jaqsy jańalyq ekenin atap ótti.

«Bul jerde oqý baǵdarlamalarynda jańa aspektilerdi beıimdeý mańyzdy. Prezıdent tsıfrlandyrý taqyrybyna da keńinen toqtaldy. Ol 100 myńǵa jýyq IT salasynyń mamandaryn daıyndaý kerektigin jetkizdi. Bul qazirgi zaman talaby. Meniń oıymsha bul salaǵa degen suranys arta túsýi kerek. Memleket basshysy naqty ári keshendi jospardy aıqyndap berdi. Endigi maqsat - oryndaý», - dedi sarapshy.

Eske salsaq, 1 qyrkúıek kúni QR Prezıdenti Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty halyqqa Joldaýyn jarııalady. Joldaýdyń tolyq mátini myna jerde.