Prezıdent mınıstrler men ákimderge: Qaǵazbastylyq, kózboıaýshylyq degendi doǵarý qajet

<p>ASTANA. KAZINFORM &ndash; Prezıdent Qasym-Jomart Toqaev qaıta jasaqtalǵan Úkimettiń keńeıtilgen otyrysynda ótken jyldyń tabysty bolǵanyn atap ótti.</p>

«Jalpy, ótken jyl elimiz úshin tabysty boldy dep aıtýǵa bolady. Árıne, sheshimin tappaǵan ózekti máseleler áli de bar. Sondyqtan, elimizdiń sapaly damýy úshin tıisti sheshimderdi qabyldaýymyz qajet. Biz aldaǵy ýaqytta jańa ekonomıkalyq baǵdarmen júremiz desek, Úkimet pen ákimder jumys isteý tásilin túbegeıli ózgertýge tıis. Ulttyq ekonomıkany órkendetý úshin jańa ıdeıalar jáne uzaq merzimge arnalǵan júıeli ustanym qajet. Biz elimizdiń damý qarqynyn kúsheıtýimiz kerek. Ekonomıkany ártaraptandyryp, shetelden kóbirek ınvestıtsııa tartý qajet. Úkimettiń basty mindetteriniń biri – ekonomıkalyq qyzmet sýbektileriniń bárine birdeı jaǵdaı jasaý. Ekonomıkaǵa jańa serpin berý úshin Úkimet kásipkerlermen, ınvestorlarmen tolyqqandy seriktes retinde tyǵyz baılanysta jumys isteýi qajet», - dedi Memleket basshysy.

Qasym-Jomart Toqaev memlekettik apparat barynsha tıimdi jáne úılesimdi jumys isteýi kerektigin de aıtty.

«Qaǵazbastylyq, kózboıaýshylyq degendi doǵarý qajet. Osyndaı jaǵymsyz úderisterdiń kesirinen jurttyń reformaǵa jáne Ádiletti Qazaqstanǵa degen senimi azaıady. Joǵarydan tapsyrma berilgenin, azamattardan aryz túskenin nemese jaǵdaıdyń nasharlap ketkenin kútip otyrmaý kerek. Bastama kóterip, derbes jumys isteı bilý qajet», - dedi Prezıdent.