Prezıdent: Men keledi dep aıaq astynan jol jóndeý – múldem masqara jaǵdaı

SEMEI. QazAqparat - Qasym-Jomart Toqaev Abaı oblysyna kelýine oraı joldardyń jedel jóndelgenine qatysty pikir bildirdi, dep habarlaıdy QazAqparat Aqordaǵa silteme jasap.

Ormanshylardyń otbasy músheleriniń biri jol týraly surady.

«Bizdiń Ýspenka aýylynda eshqashan asfalt bolǵan emes. Shaǵal jol ǵana. Mundaǵy adamdar asfaltty ómirinde kórmegen. Tipti qazir órt sóndirýge kelgenderdiń kóligi de durys júre almady. Jol jóndeńder dep shaǵymdansaq, ótinishimizge qulaq asqan emes. Ylǵı «qarjy joq» dep qaıtarady. Al qazir siz keledi degen soń joldardy jóndep shyqty, ádemilep bylaı jamap qoıǵan. Qarańyzshy», - dedi ol.

«Men keledi dep aıaq astynan jol jóndeı bastaý durys emes. Bul – múldem masqara jaǵdaı. Men bul týraly oqydym, bilemin. Kináliler jazalanady», - dedi Memleket basshysy.

Eske sala keteıik, búgin Abaı oblysynyń ákimdigi bul aqparatty joqqa shyǵaryp, málimdeme jasaǵan edi.

Vedomstvonyń aıtýynsha, «Borodýlıha-Jernovka-Pollog» jolynda kólik quraldarynyń, onyń ishinde qutqarý qyzmeti men volonterlerdiń qozǵalys qarqyny artqan. Osyǵan baılanysty órt sóndirý shtabyna kelip-ketetin avtomobıl aǵynyn eskerip, qaýipsiz qozǵalysty qamtamasyz etý jáne júrý bóligin shańnan aryltý maqsatynda joldaǵy shuńqyrlar ýaqytsha bitelgen.