Prezıdent memlekettik saıasattyń negizgi baǵyttary boıynsha kún tártibin aıqyndap, baǵdaryn naqtylap berdi – Qarın

<p>Erlan Qarın Memleket basshysy Qasym-Jomart Toqaevtyń &laquo;Egemen Qazaqstan&raquo; gazetine bergen suhbatyna qatysty pikir bildirdi. Memlekettik keńesshi pikirin Telegram jelisinde jarııalady, dep habarlaıdy <a href="https://kaz.inform.kz/news/kenesari-hannan-zhetken-kuran-kozha-ahmet-yasaui-kesenesne-tapsirildi-erlan-karin-5d0646/%D0%9Aazinform." target="_blank" rel="noopener">Kazinform.</a></p>

«Memleket basshysynyń «Egemen Qazaqstan» gazetinde jarııalanǵan suhbatynyń formaty áńgimelesý sıpatynda bolǵanymen, kólemi men mazmuny turǵysynan alǵanda baǵdarlamalyq maqala deýge ábden bolady. Óıtkeni suhbat qoıylǵan suraq pen berilgen jaýaptyń kóptigimen ǵana emes, qoǵamda qyzý talqylanyp jatqan kókeıtesti máselelerdi tutastaı qamtyǵanymen erekshelenip tur. Solaısha, Prezıdent memlekettik saıasattyń negizgi baǵyttary boıynsha kún tártibin aıqyndap, baǵdaryn naqtylap berdi.

Biz úshin Prezıdenttiń ishki saıasat jáne ıdeologııa salasyna qatysty aıtqan oı-pikiri men belgilegen basymdyqtary asa mańyzdy. Memleket basshysy birqatar bastama men jobanyń jaı-japsaryn jetkizip, ańdatpa jasady.

- Ulttyq quryltaıdyń kezekti otyrysy ótedi;

-Turmystyq zorlyq-zombylyqqa qatysty jazany qatańdatý qolǵa alynady;

- 2024 jyly ótetin aıtýly is-sharalar men basqa da ataýly kúnderdiń bet-beınesin belgiledi.

Qasym-Jomart Toqaevtyń taqyrypqa shyǵarylǵan «Biz ozyq oıly ult retinde tek qana alǵa qaraýymyz kerek!» degen sózi barlyq ıdeıanyń ózegi. Jalpy alǵanda, bul sóz Prezıdent júrgizip otyrǵan ıdeologııalyq baǵyttyń shaǵyn formýlasy. Bul sóz qoǵamdy jasampazdyqqa jeteleıdi: ótken kúnmen ómir súrmeı, bolashaqqa nyq qadam basýǵa úndep, halyqty bóletin emes, biriktiretin jalpyulttyq qundylyqtardy basshylyqqa alýǵa shaqyrady», - dep jazdy Erlan Qarın Telegram arnasyndaǵy paraqshasynda.