Prezıdent: Memleket qıyn kezde bankterge kómektesti – endi bankter halyqty qoldaýy kerek

NUR-SULTAN. QazAqparat – Qazaqstan Prezıdenti Qasym-Jomart Toqaev ekinshi deńgeıli bankterdi azamattyq jaýapkershilikke shaqyrdy, dep habarlaıdy QazAqparat tilshisi.

«Qazir kásipkerlerdiń kóbi TJ ýaqytynda nesıege paıyz qospaýdy suraıdy. Bulaı bolsa bankterdiń ózi de shyǵynǵa batady. Bankter de - bizdiń ekonomıkanyń ajyramas bir bóligi. Sol sebepti men taǵy da ekinshi deńgeıli bankterdi konstrýktıvızmge, azamattyq jaýapkershilikke shaqyramyn. Bankter qıyn jaǵdaıǵa tap bolǵanda memleket olarǵa aıtarlyqtaı kómek kórsetti. Al qazir sizderden halyqqa jáne otandyq bızneske qoldaý kerek bolyp tur», - dedi Memleket basshysy halyqqa jasaǵan málimdemesinde.

Qasym-Jomart Toqaev qajet bolǵan jaǵdaıda memleket qosymsha dırektıvti sharalardy qabyldaıtynyn jetkizdi.

«Eger jaǵdaı ary qaraı ýshyqsa, Úkimet men qarjylyq retteýshiler atalmysh máseleni sheshý sharalaryn qabyldaıdy», - dedi Prezıdent.