Prezıdent membaǵdarlama nátıjeleri jaıynda: Úkimet munyń sebebin anyqtaýy tıis
13:47, 08 Aqpan 2022
NUR-SULTAN. QazAqparat – Qarjyny jergilikti jerde kóbirek qaldyrýǵa mán bergen jón. Bul týraly Úkimettiń keńetilgen otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Men buǵan deıin bıýdjetaralyq qatynastyń jańa júıesin qalyptastyrý týraly tapsyrma bergen bolatynmyn. Osy tapsyrmany taǵy da esterińizge salamyn. Bul rette qarjyny jergilikti jerde kóbirek qaldyrýǵa mán bergen jón», -dedi Memleket basshysy.
QR Prezıdenti elimizde 3 jyldan beri «Qarapaıym zattar ekonomıkasy» atty baǵdarlama júzege asyrylyp jatqanyn eske saldy.
«Bul baǵdarlamanyń negizgi maqsaty - ishki naryqty halyq tutynatyn otandyq taýarmen qamtamasyz etý. Alaıda osy kezeńde eksport kólemi burynǵy deńgeıde qalyp, ımporttyń úlesi 8 paıyzǵa ósken. Úkimet munyń sebebin anyqtaýy tıis», - dedi Qasym-Jomart Toqaev.