Prezıdent Májilis tóraǵasy Erlan Qoshanovty qabyldady
Erlan Qoshanov Májilistiń qazirgi zań shyǵarý qyzmeti týraly baıandady.
Onyń aıtýynsha, josparlanǵan ózgeristerdi zańnamalyq turǵyda qamtamasyz etý jónindegi Memleket basshysynyń júktegen barlyq mindeti tıisti deńgeıde jáne ýaqytyly oryndalyp jatyr.
Sońǵy eki aıda ǵana Májilis 18 zań qabyldap, Senattyń qaraýyna jibergen.
Atap aıtqanda, otbasylyq-turmystyq zorlyq-zombylyqqa qarsy is-qımyl, tsıfrlandyrý, ǵylym, bıznes júrgizý, medıtsına qyzmetkerleriniń jaýapkershiligin saqtandyrý, transferttik baǵa belgileý, halyqtyń kóshi-qon máseleleri sekildi quqyqtyq normalarǵa túzetýler engizilgen.
Qazirgi ýaqytta Prezıdenttiń tapsyrmasyn oryndaý úshin depýtattar Bıýdjet, Sý, Qurylys kodeksteri, sondaı-aq birqatar mańyzdy zań jobalary boıynsha bir mezette jumys júrgizýde.
Engizilgen árbir jańa ózgeristi sarapshylar men jurtshylyq keń kólemde talqylaıdy, palatanyń barlyq is-sharasyna buqaralyq aqparat quraldary men múddeli úkimettik emes uıymdardyń ókilderi kedergisiz qatysa alady.
Erlan Qoshanov sondaı-aq «Amanat» partııasynyń jumysy týraly málimet berdi.
Azamattardyń ál-aýqatyn arttyrýǵa baǵyttalǵan Prezıdenttiń bastamalaryn iske asyrý sheńberinde ázirlengen partııanyń «Aýyl amanaty», «Jer amanaty», «Qaryzsyz qoǵam» jobalaryna erekshe nazar aýdaryldy.
Barlyq joba halyqtyń naqty máselelerin sheshýdi kózdeıdi jáne olardy qoǵam qyzý qoldap otyr.
«Jer amanaty» jobasy aıasynda eki jyl ishinde 10 mıllıon gektardan astam jer memleketke qaıtarylǵan.
Qańtar-aqpan aılarynda «Qaryzsyz qoǵam» jobasy boıynsha 15 myń adam qarjylyq saýattylyqty arttyrý kýrsynan ótken. Jyl sońyna deıin taǵy da 750 myń azamatty oqytý josparlanyp otyr.
Depýtattardyń parlamenttik dıplomatııa baǵytyndaǵy qyzmeti týraly aqparat berdi.