Prezıdent maqalasy ult sanasyna jańa serpilis beredi – Qýanysh Sultanov
«Birinshiden, Elbasy Nursultan Ábishulynyń jańa maqalasy búgin týa qalǵan dúnıe emes. «Uly dalanyń jeti qyry» uzaq jyldarǵy tereńnen qozǵalǵan oı tolǵanysynyń, tolassyz izdenistiń, qajyrly qaıratkerlik eńbektiń, kóshbasshylyq qasıettiń, qııan asýda qııa baspaı órkenıettiń óskeleń jolyn taba bilerlik danalyqtyń nátıjesi. Osy eńbekte júıelengen taqyryptar men tarıhı derekter, qubylystar kórinisterin Prezıdenttiń bizdiń jańa dáýirimizdegi resmı baıandamalarymen qatar oqýshysymen oı qorytyp, pikir alysý maqsatynda jarııalaǵan talaı eńbekterinen baıqaý qıyndyq týǵyzbaıdy. Tipti, Elbasynyń bastamashyldyǵymen birneshe jyl jemisti júrgizilgen «Mádenı mura» baǵdarlamasynan tys bir jylymyz «Tarıh jyly» dep atalǵany da el esinde. Sol sııaqty kóp jumystardyń uzaq jyldar boıyna júrgizilip kele jatqanyn aıtsaq ta jetkilikti. Memlekettik táýelsizdigimizdi jarııalap, dúnıejúzilik qoǵamdastyqqa múshe bolǵan alǵashqy kúnderden bastap Elbasy bizdiń búgingi memlekettigimizdiń tamyry tereńde jatqandyǵyna, tarıh tolqynynda talaı-talaı syndarly kezeńderden arpalyspen, kúrespen ótip, ulttyń ult bolyp saqtalyp qana qalmaı, álemdik órkenıet damýyna óz úlesimizdi qosa alarlyq múmkindigimizdiń mol ekendigine aıryqsha mán, mańyz berip kele jatqanyna el, jurt, bizdiń ultymyzdyń táýelsizdik tusyndaǵy ósýi, órkendeýi, jetistikteri aıqyn kýá, ári dálel», - dep toqtaldy depýtat.
Osy oraıda Q. Sultanov biz táýelsizdik jyldary táýelsizdigimizge deıingi eki júz jylǵa jýyq merzimde armandap, qol jetkize almaı, kózimiz kóre almaǵan múlde jańa jetistikterge qol jetkize alǵanymyzdy atap ótti. Onyń aıtýynsha, bastyǵyrylyp, qursaýlanyp qalǵan ulttyq sanamyz serpilip, sana erkindigine, bostandyǵyna kóterildik. Álemdik teńdikke qol jetkizdik. Kimmen bolsa da terezemiz teń dárejede sóılese alatyn boldyq. Óz daýysymyzdy, sózimizdi basqalarǵa tyńdata alatyn qabylet pen dárejege jettik.
«Ekinshiden, maqalanyń árbir taraýy, árbir sózi ult sanasynyń qýattana túsýine jańa mazmun, jańa keńistik, jańa serpin beredi. ıAǵnı, árbir azamat óz tarıhynyń tereńine boılap, ult teginiń myqtylyǵyna, qabyletine kóz jetkizedi. Ulttyq memleketimizdiń órkenıet keńistigindegi tarıhı orny men adamzat qoǵamynyń beıbit baǵytta jasampazdyqpen ósip, damı alatynyna aıryqsha ekpin berilgen. Elimizdiń ejelgi tarıhyn tanyp, zertteý jolynda jańa kózqaras, jańa dúnıetanym qalyptastyrý mańyzdylyǵy zaman týǵyzyp otyrǵan qajettilik. Tarıhı tamyrymyzdyń tereńdigi men dástúrli myqtylyǵyna senip, búgingi jáne aldymyzdaǵy ymyrasyz básekelestik alapatynda qapy qalmaýymyz jan-jaqty eskertilgen. Talaı kezeńderde kósh basynda júrip, jol shetinde qalyp qoımaýdyń qamyn aldymen oılaý mindeti aıtylady. Búgingi jasalyp júrgen sharalar bolashaqqa eńbek etedi», - dedi halyq qalaýlysy.
Onyń atap ótýinshe, úshinshiden, osy eńbekte Qazaq jeriniń Túrki áleminiń altyn besigi ekendigine aıryqsha mán berilgen. Nursultan Nazarbaev Túrki áleminiń tereń tarıhyn maqtanysh ete otyryp, onyń ásirese bolashaq damýymyzdaǵy ornyna basa nazar aýdarady. Ótken tarıh rýhanı qazynamyz, sonymen birge asyl tek nár alar qaınar bulaǵymyz ekenin eskertedi.
«Elbasynyń: «Tarıh pen geografııa túrki memleketteri men uly kóshpendiler ımperııalary sabaqtastyǵynyń aıryqsha modelin qalyptastyrdy. Bul memleketter uzaq ýaqyt boıy birin biri almastyryp, orta ǵasyrdaǵy Qazaqstannyń ekonomıkalyq, saıası jáne mádenı ómirinde óziniń óshpes izin qaldyrdy. Orasan zor keńistikti ıgere bilgen túrkiler ulanǵaıyr dalada kóshpeli jáne otyryqshy órkenıettiń ózindik órnegin qalyptastyryp, óner men ǵylymnyń jáne álemdik saýdanyń ortalyǵyna aınalǵan ortaǵasyrlyq qalalardyń gúldenýine jol ashty», - degen paıymdaýlarynda elimizdiń bolashaǵyna úlken úmit pen mindet artylyp tur. Túrki áleminiń Uly Jibek jolymen jalǵasynda da tolaǵaı tabysqa toly ıgeriler múmkindikterdiń jatqany belgili», - dedi Qýanysh Sultanov.