Prezıdent laýazymyna bir-aq ret saılaný erejesi endi eshqashan ózgermeıdi – Qasym-Jomart Toqaev

<p>Memleket basshysy Qasym-Jomart Toqaev Egemen Qazaqstan gazetine bergen <a href="https://kaz.inform.kz/news/bz-ozik-oyli-ult-retnde-tek-kana-alga-karauimiz-kerek-kasim-zhomart-tokaev-1e1b19/" target="_blank" rel="noopener">suhbatynda </a>eki jyldan keıin Prezıdent saılaýy ótetini týraly qaýesetti teriske shyǵardy, dep habarlaıdy <a href="Kazinform" target="_blank" rel="noopener">Kazinform</a>.</p>

Suhbat alýshy «Qazaq gazetteri» JShS Bas dırektory Dıhan Qamzabekuly Prezıdent Konstıtýtsııaǵa qatysty referendým ótkizip, 2026 jyly taǵy da saılaýǵa túsedi degen qaýesettiń ras-ótirigin surady.

«Bul – jalǵan aqparat. Budan bylaı árkim oıyna kelgenin istep, Ata zańǵa ońdy-soldy ózgeris engize almaıdy. Al osyndaı mańyzdy máselege kelgende, tipti múmkin emes. Men buǵan nyq senimdimin. Konstıtýtsııalyq reforma Ata zańǵa qalaı bolsa solaı ózgeris engize berý úshin jasalǵan joq. Prezıdent laýazymyna bir-aq ret saılaný týraly ereje endi eshqashan ózgermeıdi. Bul talap memleketimizdiń táýelsizdigi, birtutastyǵy, aýmaqtyq tutastyǵy jáne basqarý nysany týraly normalar sııaqty myzǵymastaı etip bekitilgen», - dep jaýap berdi Qasym-Jomart Toqaev.

Prezıdent jetijyldyq bir ǵana merzim týraly ıdeıany osydan 15 jyl buryn jabyq pikirtalastarda aıtyp júrgenin atap ótti.

«Sol kezde usynys asa qoldaý taba qoımady. Ózim Prezıdent bolyp saılanǵannan keıin, osy bastamamnyń artyqshylyǵy men kemshiligin ábden salmaqtap, ony qalaı júzege asyrýǵa bolatyny jóninde kóp oıladym. Sýperprezıdentke tán ókilettikterdi joıý úshin 2022 jyly Konstıtýtsııaǵa birqatar mańyzdy ózgeris engizildi. Men sol kezde jetijyldyq bir merzim ıdeıasyn qaıta usyndym. Bastamama búkil halyq qoldaý bildirdi. Osymen bul áńgime támam», - deıdi Memleket basshysy.