Prezıdent latyn álipbıiniń alǵashqy nusqasyn nege qaıtardy

ASTANA. QazAqparat - Búgin Qazaqstan halqy Assambleıasynyń ǵylymı-sarapshylyq keńesiniń keńeıtilgen májilisinde qoǵam qaıratkeri Myrzataı Joldasbekov latyn álipbıiniń alǵashqy nusqasyn qalaı kórsetkenin eske aldy, dep xabarlaıdy QazAqparat tilshisi.

«Táýelsizdik alǵannan keıin partııa tarady. Sol partııadan qatty qorqýshy edik qoı. Endi, eshkimnen qoryqpaımyz. Sol kezde men Qazaqstannyń bas ıdeology boldym. Sonda maǵan tanymal lıngvıster kelip, táýelsiz el boldyq qoı, latyn álipbıine kósheıik dedi. Men birden kelise kettim. Ol kezde belgili bir qıyndyqtardyń bar ekenin bilmedik. Sóıtip, akademık Ábdýáli Qaıdar bastaǵan ǵalymdar toby latyn álipbıiniń alǵashqy nusqasyn daıyndap berdi», - deıdi Myrzataı Joldasbekuly.

Onyń aıtýynsha, alǵashqy nusqa oǵan birden unady. Sosyn bári Prezıdentke bardy. Nursultan Nazarbaev barlyq ǵalymdardy muqııat tyńdap shyqty. Biraz suraqtaryn qoıdy. «Sosyn bári durys, biraq asyqpaıyq dedi. Latyn álipbıiniń ýaqyty da keletinin jetkizdi. Mine, ol ýaqytqa da keldik», - dep atap kórsetti ǵalym.

Aıta keteıik, búgingi otyrysta Darxan Myńbaı latyn álipbıin qoldanýda "QazAqparattyń" eńbegin erekshe atap ótti.  Al Axmet Baıtursynuly atyndaǵy til bilimi ınstıtýtynyń dırektory Erden Qajybek qazaqstandyqtar arasyndaǵy "á", "ó", "ú" sııaqty qazaq áripteriniń latyn nusqasyna qatysty synyna jaýap berdi .  Otyrys sońynda uıym músheleri latyn álipbıin engizýge qatysty jalpyxalyqtyq úndeý jasady .