Prezıdent qytaılyq ınvestordyń Jambyl oblysynda JES salý bastamasyn qoldady

SIANЬ. QazAqparat - Memleket basshysy Qasym-Jomart Toqaev State Power Investment Corporation kompanııasynyń basqarma tóraǵasy Tsıan Chjımındi qabyldady, dep habarlaıdy QazAqparat Aqordaǵa silteme jasap.

Kezdesý barysynda jańartylatyn energııa kózderi salasyndaǵy jobalardy iske asyrý máseleleri talqylandy.

Qytaıdyń iri energetıkalyq kompanııalarynyń qataryna kiretin State Power Investment Corporation Qazaqstannyń jasyl energetıka salasyndaǵy jobalaryna belsendi túrde ınvestıtsııa quıady.

Qasym-Jomart Toqaev kompanııanyń Jambyl oblysynda qýaty 1 GVt bolatyn aýqymdy jel elektr stantsııasyn salý jónindegi bastamasyn qoldady. Prezıdentke State Power Investment Corporation kompanııasynyń Qazaqstanda jel elektr stantsııalaryna arnalǵan qural-jabdyq óndirisin iske qosý nıeti týraly málimet berildi.

Óz kezeginde Tsıan Chjımın áleýmettik jaýapkershilik aıasynda onyń kompanııasy Qazaqstannyń ońtústiginde qýaty 200 GKallǵa deıin jetetin jylý stantsııasyn salýdy josparlap otyrǵanyn jetkizdi.

Sonymen qatar, kezdesýde State Power Investment Corporation kompanııasynyń tehnologııalyq jáne ǵylymı-zertteý tájirıbesi mol ekeni eskerilip, «jasyl» sýtegi óndirisi salasyndaǵy yntymaqtastyq perspektıvalary qarastyryldy.