Prezıdent: Qylmystyq jáne azamattyq isterdiń nebári 5 paıyzy kassatsııaǵa joldanady

ASTANA. QazAqparat - Memleket basshysy kásipkerlermen kezdesýde ákimshilik ádiletti aıtarlyqtaı kúsheıtip, onyń qoldanys aıasyn keńeıtý qajettigin sóz etti, dep habarlaıdy QazAqparat Aqordaǵa silteme jasap.

«Búginde qylmystyq jáne azamattyq isterdiń nebári 5 paıyzy ǵana kassatsııaǵa joldanady. Bul óte az jáne azamattardyń suranysyna sáıkes kelmeıdi. Sondyqtan zańgerler jáne kásipkerler qoǵamdastyǵymen óz aldyna bólek kassatsııalyq ınstantsııa qurý máselesi jóninde keńes ótkizý qajettigi pisip jetildi dep oılaımyn. Sýdıalar korpýsy bul qadam azamattardyń quqyqtaryn sapaly qorǵaýǵa múmkindik beredi dep sanaıdy. Prezıdent ákimshiligi bul máseleni qolǵa alady. Kassatsııalyq sotty qurý jóninde ortaq pikirge kelsek, sot júıesiniń bıýdjetin ulǵaıtýǵa jol bermeımiz. Bıznestiń zańdy múddesin saqtaý jáne qorǵaý – bul bizdiń basty mindetimiz. Sondyqtan ákimshilik ádiletti aıtarlyqtaı kúsheıtip, onyń qoldanys aıasyn keńeıtý qajet. Bul is júzinde óziniń qajettiligin jáne tıimdiligin kórsetti», - dep atap ótti Qasym-Jomart Toqaev jıynda.

Onyń aıtýynsha, búginde sot sheshimderiniń 60 paıyzdan astamy azamattar men bıznestiń paıdasyna sheshiledi (buryn 15% paıyzdan kem bolǵan).

Bul oń úrdis, áıtse de asyrasilteýshilikke jáne qubylýshylyqqa jol berýge bolmaıdy.

Sebebi memlekettik apparattyń bıznesti sotqa júginýge májbúr etetin kemshilikterdi túzetý jumystary tıisti deńgeıde júrgizilmeıdi.

«Úkimetke Joǵarǵy Sotpen jáne Ulttyq kásipkerler palatasymen birlesip, memlekettik organdar qyzmetindegi teris áreketterge muqııat taldaý jasaýǵa jáne olardy joıý úshin pármendi sharalar qabyldaýǵa tıis. Qaıtalap aıtamyn. Memlekettik apparattyń mindeti – elimizdegi zańdy kásipkerlik qyzmetke jan-jaqty kómek kórsetý. Zańdy buzyp, bızneske qandaı da bir kedergi jasaý – memlekettik sıpattaǵy qylmys. Men, Prezıdent retinde, Qazaqstandy bızneske, sonyń ishinde iri, orta jáne shaǵyn kásipkerlikke óte qolaıly jaǵdaı jasalǵan elge aınaldyrýdy óz mindetim dep sanaımyn», - dedi Memleket basshysy.