Prezıdent ІІM-ge Bıshimbaevtiń isin erekshe baqylaýǵa alýdy tapsyrdy

<p>Prezıdent Іshki ister mınıstri Erjan Sádenovpen, Bas prokýror Berik Asylovpen, Joǵarǵy Sot tóraǵasy Aslambek Merǵalıevpen, sondaı-aq basqa da salalyq vedomstvolardyń basshylarymen kezdesip, konsýltatsııalar ótkizdi, dep habarlaıdy <a href="https://kaz.inform.kz/?_gl=1*1kwhfs8*_ga*NzgwMzg1NDY2LjE2OTQ4MzQ5NTM.*_ga_Y44SMVECD5*MTcwMDAwOTY3Mi42NC4wLjE3MDAwMDk2NzIuNjAuMC4w&amp;pk_vid=950730acf4cfe4b61700009675cf80e5" target="_blank" rel="noopener">Kazinform </a>Aqordanyń <a href="https://www.akorda.kz/kz/prezident-kukyk-korgau-organdarynyn-basshylarymen-kenesti-15105427" target="_blank" rel="noopener">baspasóz </a>qyzmetine silteme jasap.</p>

Memleket basshysy zańnyń saqtalýyna, azamattardyń quqyqtyq sanasy men quqyqtyq mádenıetiniń deńgeıin arttyrýǵa qatysty máselelerge basa mán berdi.

Qasym-Jomart Toqaevtyń pikirinshe, Zań men Tártip qaǵıdaty Qazaqstan qoǵamynyń ıdeologııalyq jáne saıası temirqazyǵyna aınalýǵa tıis. Qazirgi qalyptasqan jaǵdaı kóshedegi mádenıetsizdikten bastap tóbeles, urlyq, kisi óltirýge deıingi quqyqbuzýshylyqtyń barlyq túrine ymyrasyz qarsy turýdy talap etedi.

Prezıdent osyndaı keleńsizdiktermen tutas qoǵam bolyp kúresý kerek dep sanaıdy. Elimizde turmystyq zorlyq-zombylyq, vandalızm, dórekilik jáne buzaqylyq sııaqty Zań men Tártip buzýshylyqtyń kez kelgen túrine múlde tózbeıtin ári ony qatań aıyptaıtyn jaǵdaı qalyptastyrý qajet. Áıelder men balalarǵa zorlyq-zombylyq kórsetý faktileriniń batyl túrde jolyn kesý kerek.

Qasym-Jomart Toqaev Іshki ister mınıstrligine elorda meıramhanalarynyń birinde bolǵan kisi ólimine qatysty rezonans týdyrǵan oqıǵany erekshe baqylaýǵa alýdy tapsyrdy.

– Zań bárine birdeı. Azamattarymyz zańdylyqty nyǵaıtý jolynda judyryqtaı jumylsa ǵana qoǵamda ádildik ornaıdy. Ádiletti Qazaqstan – Zań men Tártip ústemdik quratyn el, – dedi Prezıdent.

Esterińizge sala keteıik, Memleket basshysy Respýblıka kúni qarsańynda ótken jıynda sóılegen sózinde Ádiletti Qazaqstandy qurý úshin quqyqtyq mádenıetti damytý qajet degen bolatyn.

«Zańsyzdyq, tártipsizdik, mádenıetsizdik eldi jarǵa jyǵady. Mundaı jaǵymsyz úrdiske búkil qoǵam bolyp qarsy turýymyz kerek. Al tártipke baǵynǵan qoǵam órkenıetti bolady. Bul – zańdylyq. Ár azamat elimizdiń zańyn qurmettese, bereke-birlik te, baqýatty turmys ta bolady», – dedi Qasym-Jomart Toqaev.

Prezıdent kezdesýler men konsýltatsııalar barysynda qoǵamda ádildik pen tártip ornatý úshin quqyq qorǵaý organdary men sot ınstantsııalary qyzmetkerlerine aıryqsha jaýapkershilik júkteletinin atap ótti.