Prezıdent qoıǵan mindetterdi sheship, nátıjege jumys isteý kerek- Japsarbaı Qýanyshev

NUR-SULTAN. QazAqparat - Prezıdent qoıǵan mindetterdi sheshe otyryp, nátıjege jumys isteý kerek. Mundaı pikirdi QR Bilim jáne ǵylym mınıstrligi Memleket tarıhy ınstıtýtynyń bas ǵylymı qyzmetkeri Japsarbaı Qýanyshev bildirdi, dep habarlaıdy QazAqparat tilshisi.

«10 baǵyttyń jeteýi áleýmettik máseleni sheshýge arnalǵan. Óz basym osy baǵyttardy áleýmettik blok, rýhanı blok dep bóle otyryp, onynshysyn - bizdiń bolashaq dep aıtar edim. Taldap otyrsaq, munda eshqaısysy tańsyq emes. Bári de talqylanyp jatqan taqyryp - Elbasy bastaǵan baǵyt-baǵdar. Alaıda biz óz damýymyzdaǵy jańa kezeńge aıaq basyp kelemiz. Bıliktiń aýysýynan emes, ýaqyttyń talaby osy qadamǵa barýǵa májbúrlep otyr. Táýelsizdik kezeńinde ósip jetilgen bútindeı bir býyn osynaý protsesterdiń belsendi qatysýshylary ekeni daýsyz. Jastar qazir basqasha oılaıdy», - dedi Japsarbaı Qýanyshev Qazaqstan strategııalyq zertteýler ınstıtýtynyń uıymdastyrýymen elordada ótken «Prezıdent Toqaevtyń 10 mindeti: el damýynyń jańa deńgeıi» atty dóńgelek ústelde.

Sarapshynyń paıymyna súıensek, QR Aqparat jáne qoǵamdyq damý mınıstri Dáýren Abaev «shyndyqty izdeýshiler» dep ataǵan jastarǵa memleket aıqyn jaýabyn berýi kerek.

«Bul rette Prezıdent qoıǵan mindetterdi sheshe otyryp, nátıjege jumys isteý kerek. Elimizdegi árbir azamat ary qaraı ne isteý kerektigin bilýi tıis. Nátıjege jetkizetin mehanızmderdi iske qosqan abzal», - deıdi ol.

Eske sala ketsek, QR Prezıdenti Qasym-Jomart Toqaev ózin ulyqtaý rásiminde eldi damytýdyń negizgi 10 baǵytyna basa mán berý qajettiligin aıtqan bolatyn.