Prezıdent kórsetken mindetter damýdyń odan arǵy traektorııasyn aıqyndaıdy - Ahmetjan Shardınov

ALMATY. QazAqparat - Almatyda búgin qalalyq keńestiń Ekonomıka jáne bıýdjet boıynsha komıssııasynyń otyrysy ótti. Jınalǵandar QR Prezıdenti Nursultan Nazarbaevtyń Qazaqstan halqyna arnaǵan «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýynda aıtylǵan mindetterdi talqylady, dep habarlaıdy QazAqparat tilshisi.

Komıssııa tóraǵasy Ahmetjan Shardınovtyń aıtýynsha, Memleket basshysy kórsetken mindetter damýdyń odan arǵy traektorııasyn aıqyndamaq.

«Bul mindetter júzege asyrylǵan jaǵdaıda Qazaqstan úshin aldyńǵy qatarly 30 eldiń qataryna kirý múmkindigi óte aıqyn. Birinshi kezekte Elbasy ekonomıkany ındýstrııalandyrýǵa, jańa tehnologııalardy engizýge basymdyq berdi. 2018 jyly «tsıfrlyq dáýir» ónerkásibin qalyptastyrýǵa arnalǵan ındýstrııalandyrýdyń úshinshi besjyldyǵyn ázirleýge kirisý kerek. Bul óte oryndy aıtylǵan oı. Sebebi ındýstrııalandyrý protsesi ınnovatsııalyq tehnologııalarsyz múmkin emes. Al resýrstar potentsıalyn únemdeý máselesine kelsek, energııa óndiretin kásiporyndardyń óziniń ekologııalyq tazalyǵyn, únemdiligin qamtamasyz etý asa mańyzdy másele. Bıznes klımatty jaqsartýǵa qandaı áreket jasap, bıznesti odan ári retteýge baǵyttalǵan qandaı zań qabyldaý kerektigimiz aıqyndaldy», - dedi Ahmetjan Shardınov.

Aıta ketý kerek, 9-qańtarda QR Memleket basshysy Nursultan Nazarbaev «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty kezekti Joldaýyn jarııalaǵan bolatyn.