Prezıdent Konstıtýtsııalyq Sottyń 2023 jyly atqarǵan jumysyna baǵa berdi

<p>ASTANA. KAZINFORM -&nbsp; <strong>Memleket basshysy Konstıtýtsııalyq Sot tóraǵasy Elvıra Azımovany </strong><strong>qabyldady</strong>. Bul týraly Aqordanyń baspasóz qyzmeti habarlady.</p>

Elvıra Azımovanyń baıandaýynsha, byltyr Konstıtýtsııalyq Sotqa bes myńnan astam ótinish, onyń 99 paıyzy azamattardan kelip túsken. Azamattar óz ótinishterinde sot aktilerine, laýazymdy tulǵalar men sýdıalardyń is-áreketteriniń zańdylyǵyna, qylmystyq jazanyń túrleri men sharttaryna, qylmystyq qýdalaý kezinde adam quqyqtarynyń saqtalýyna, eńbek jáne ákimshilik-quqyqtyq qatynastarda quqyqtyń qorǵalýyna qatysty máselelerdi kótergen. konstıtýtsııalyq is júrgizý aıasynda azamattarǵa kepildi zań kómegin berý sharttary, sondaı-aq quqyqtyq monıtorıng pen zań shyǵarý qyzmeti sheńberinde Konstıtýtsııalyq Sot qabyldaǵan sheshimderdi jáne sot praktıkasynyń sholýyn eskerý týraly usynystar qazirgi ýaqytta Parlament Májilisiniń qaraýynda jatyr.

Byltyr 558 quqyq normasy tekserilip, nátıjesinde 29 normatıvtik-quqyqtyq aktige ózgerister engizý jóninde keńes berilgen.

Qylmystyq-protsessýaldyq, Salyq kodeksteriniń jáne birqatar zańnyń jekelegen normalaryn qaıta qaraý jóninde usynystaryn bergen. Búginde Úkimet pen ýákiletti organdar atalǵan usynymdardyń 16 paıyzdan astamyn oryndaǵan.

Prezıdent Konstıtýtsııalyq Sottyń 2023 jyly atqarǵan jumystarynyń qorytyndysyn baǵalaı otyryp, atalǵan organnyń qurylýy jáne onyń qyzmeti Qazaqstan Respýblıkasy Konstıtýtsııasynyń múltiksiz saqtalýyn qamtamasyz etýge, adam men azamattardyń quqyqtaryn, bostandyǵyn qorǵaýǵa qatysty qoǵam men memlekettiń suranysyna saı keletinin aıtty.