Prezıdent qoldaǵan jaǵdaıda Nazarbaevtyń esimi kóptegen nysandarǵa beriler edi - mınıstr Abaev

ASTANA. QazAqparat - QR Aqparat jáne kommýnıkatsııalar mınıstri Dáýren Abaevtyń aıtýynsha, Prezıdent Astanadaǵy áýejaıǵa Nazarbaevtyń atyn berý sııaqty bastamalardy kóp qoldaı bermeıdi. Áıtpese, ýnıversıtet pen áýejaıdan basqa da nysandarǵa Memleket basshysynyń esimin berýge bolatyn edi, dep xabarlaıdy QazAqparat tilshisi.

Jýrnalıster Prezıdenttiń buǵan deıin ondaı bastamalarǵa qarsy bolǵanyn, sondaı-aq óz atyn tek ýnıversıtetke bergenin jetkizip, osy jolǵy sheshimine qatysty mınıstrdiń jeke pikirin surady.

"Prezıdent osy jolǵy bastamaǵa túsinistikpen qaraıdy dep senemin. Sebebi "Nurly jol" baǵdarlamasy jáne osy aýqymdy baǵdarlamanyń avtory xalyqtyń esinde qalýy qajet. Shetel azamattary Astanaǵa kelgende aldymen áýejaıdy kóredi. Menińshe, ol jerde Nursultan Nazarbaevtyń esimi turǵany durys ári zańdy. "Nurly jol" baǵdarlamasyna Prezıdenttiń ózi bastamashy boldy. Sonyń arqasynda elimizde biraz jumystar atqaryldy. Astanadaǵy áýejaı da - sol jumystyń nátıjesi", - dedi Dáýren Áskerbekuly.

Mınıstrdiń oıynsha, Nursultan Nazarbaevtyń esimin biraz nysandarǵa berýge bolatyn edi. Alaıda sońǵy sheshimdi Prezıdenttiń ózi qabyldaıdy. "Bárimiz jaqsy bilemiz, Memleket basshysy ondaı bastamalardy kóp qoldaı bermeıdi. Kóp qoldasa, Nursultan Nazarbaevtiń esimi ýnıversıtet pen áýejaıdan da basqa kóptegen nysandarǵa beriletin edi. Prezıdenttiń ózi áli qoldaǵan joq", - dep atap kórsetti mınıstr.