Prezıdent qoǵamnyń qordalanǵan máselesin birtindep sheshýge kúsh salatynyn kórsetti - Baqyt Smaǵulov

KÓKShETAÝ. QazAqparat - Aqmola oblysyndaǵy «El birligi» qoǵamdyq birlestiginiń tóraǵasy Baqyt Smaǵulov Ulttyq qoǵamdyq senim keńesiniń otyrysynda Memleket basshysynyń málimdegen bastamalaryna qatysty pikir bildirdi, dep habarlaıdy QazAqparat tilshisi.

«Qasym-Jomart Toqaev el tizginin ustaǵaly demokratııalyq qundylyqtardy jaqsartý baǵytynda oń qadam jasaýǵa tyrysatyny ańǵarylady. Ulttyq senim keńesiniń qurylýy osynyń bir aıǵaǵy ispettes», - dedi B.Smaǵulov.

Sonymen qatar, ol jyldar boıy muz bolyp qatqan tońdy jibitý áste ońaı emes ekendigin aıtýda. Osy rette, Memleket basshysy birqatar tapsyrma berý arqyly qoǵamnyń talap-tilekterin eskerý máselesin ómirsheń etýge talpynyp otyrǵanyna toqtaldy.

«Biz táýelsizdik aldyq dep kóp nársege qol jetkizgenimizben, utylǵan tustarymyz da jeterlik. Kemshin túsken jaqtarymyz da joq emes. Sonyń biri - beıbit sherýler men mıtıngilerdi ótkizý máselesi. Kóshege shyqqandardyń bárin jaý kórý qısyndy ma?! Olar da osy eldiń bir-bir múshesi, qazaqtyń azamattary. Bar gáp - mıtıngilerdiń zańdy, zańsyzdyǵynda. Halyq ózin tolǵandyrǵan máselesin bılikke jetkize almasa ne isteýi kerek? Munyń zańdy joly qaısy. Kóshege shyǵýdy osy máseleni bılikke jetkizýdiń bir joly retinde qarastyrý sonda zańsyz ba?

Eger mundaı mıtıngilerge bıliktiń ózi teris qaramaı oń qabaq tanytsa, adamdar jaıdan-jaı japa shekpes edi.

Mine, Prezıdent Qasym-Jomart Toqaevtyń osy máseleni ómirsheń etýge talpynyp otyrǵany ańǵarylady», - dep túıindedi B.Smaǵulov.