Prezıdent QQS-ti reformalaýdy tapsyrdy: Jańa Ulttyq ekonomıka mınıstri ony qalaı sheshpek

<p>ASTANA. KAZINFORM &ndash; Elimizde salyq salý júıesi qaıta qaralady. Bul týraly Premer-Mınıstrdiń orynbasary &ndash; Ulttyq ekonomıka mınıstri Nurlan Baıbazarov aıtty.</p>

«Búgin Memleket basshysy jańa Salyq kodeksiniń jalpy ádisterin, onyń ishinde qosylǵan qun salyǵyn qaıta qaraýdy tapsyrǵan bolatyn. Osy jumystyń aıasynda biz bıznes-qoǵamdastyqpen, sarapshylarmen birge qaıta qarap, atalǵan kodeksti jazamyz. Ádisteri qaıtadan qarastyrylady desek te bolady», - dedi mınıstr Úkimettiń keńeıtilgen otyrysynan keıingi brıfıngte.

Onyń atap ótýinshe, jaǵdaıdy zerdeleý boıynsha keshendi jumys júrgizilgennen keıin atalǵan saladaǵy ózgeristerge qatysty jalpy jaǵdaı anyqtalatyn bolady.

«Bul tek qosylǵan qun salyǵyna ǵana emes, jalpy salyq salý júıesine qatysty. Bul máselege qatysty bıznes-qoǵamdastyqtyń pikirin bilemiz ári eskeretin bolamyz. Dál qazir bul tetiktiń qandaı bolatyndyǵyn aıta almaımyn. Degenmen, ýaqyty kelgende bárin aıtyp beremiz», - dedi Nurlan Baıbazarov.

Búgin Prezıdent sarapshylar qosylǵan qun salyǵyn kóterý kóleńkeli ekonomıkanyń úlesin arttyryp, ınflıatsııanyń ósýine ákep soqtyrýy yqtımal dep oryndy pikir bildirip jatqanyn aıtqan edi.

«Bul qadam elimizdiń ınvestıtsııalyq tartymdylyǵyna da keri áser etýi múmkin. Burynǵy Úkimet Ulttyq qordan bólinetin transferttiń ornyna salyqty kóterip, qazynaǵa qosymsha qarjy túsiremiz degen ýájdi alǵa tartatyn. Jańa Salyq kodeksin ázirleý barysyna Memleket basshysy retinde meniń kóńilim tolmaıdy», - dedi Memleket basshysy.