Prezıdent Kıevte qazaq jýrnalısine jasalǵan qastandyqty tergeý amaldaryn jiti baqylap otyr

<p>ASTANA. KAZINFORM — Prezıdent keńesshisi — baspasóz hatshysy Berik Ýálı Kıevte qastandyqqa ushyraǵan qazaqstandyq jýrnalıst Aıdos Sadyqov isine oraı pikir bildirdi. </p>

Onyń aıtýynsha, Memleket basshysy Kıevte Qazaqstan azamaty Aıdos Sadyqovqa jasalǵan qastandyqqa qatysty tergeý amaldaryn jiti baqylap otyr.

«Prezıdenttiń tapsyrmasyna sáıkes Qazaqstannyń quqyq qorǵaý organdary qylmystyq istiń mán-jaıyn anyqtaý úshin shuǵyl sharalar júrgizip jatyr. Memleket basshysy quqyq qorǵaý organdaryna kúdiktilerdiń qazirgi mekenjaıyn anyqtap, tıisti sharalar qabyldaýdy tapsyrdy», — dep jazdy Berik Ýálı Facebook paraqshasynda.

Ol Qazaqstan tarapy Ýkraınanyń quqyq qorǵaý qurylymdarymen, onyń ishinde Interpol júıesi boıynsha birlese jumys isteýge daıyn ekenin málimdedi. 

Eske sala keteıik, 18 maýsymda Kıevte turatyn jýrnalıst Aıdos Sadyqovty úıiniń janynda áldebireýler atyp ketken bolatyn.

Ol qazir aýrýhanada jatyr, jaǵdaıy aýyr.

Buǵan deıin Prezıdent Qasym-Jomart Toqaev Kıevte jasalǵan qastandyq jaıynda pikir bildirgen edi. 

Prezıdent keńesshisi Berik Ýálıdiń aıtýynsha, Qazaqstandy aıyptaý keıbir kúshterge tıimdi.

Búgin Іshki ister mınıstrligi Aıdos Sadyqovty atty degen kúdikti Qazaqstan polıtsııasynda jumys istemeıtinin habarlady.