Prezıdent Kıevte qastandyq jasalǵan qazaq jýrnalısi jaıynda pikir bildirdi

<p>ASTANA. KAZINFORM — Búgin Aqordada ótken saltanatty marapattaý rásimi kezinde Qasym-Jomart Toqaev Kıevte Qazaqstan jýrnalısine jasalǵan qastandyq áreketke pikir bildirdi. </p>

— Elimizde zań ústemdigin nyǵaıtyp jatyrmyz, ıaǵnı barlyq salada, eń aldymen, Zań ústemdigin qamtamasyz etý — basty mindet. Bul másele boıynsha meniń kózqarasym — aıqyn. Muny ózderińiz de jaqsy bilesizder. Qazaqstanda Zań men tártip bárinen bıik turýǵa tıis. Sondyqtan qoǵamdaǵy barlyq qarama-qaıshylyqtar men kelispeýshilikterdi tek qana quqyqtyq turǵydan, ıaǵnı tıisti zańnamaǵa jáne negizgi halyqaralyq normalarǵa sáıkes sheshý qajet. Keshe Qazaqstan azamaty Aıdos Sadyqovqa qatysty Kıevte bolǵan qylmysqa da dál osy ustanym turǵysynan qaraǵan jón. Men dıplomatııalyq arnalar men quqyq qorǵaý organdary arqyly osy oqys oqıǵa boıynsha Ýkraına tarapyna resmı suratý jiberý týraly naqty tapsyrma berdim. Sondaı-aq qajet bolǵan jaǵdaıda Qazaqstannyń resmı organdary istiń aqıqatyna jetýge járdem berý úshin tergeý jumysyna qatysýǵa daıyn ekenin aıtqym keledi, — dedi Prezıdent. 

Eske sala keteıik, keshe Ýkraınanyń Kıev qalasynda sol elde bosqyn esebinde turyp jatqan jýrnalıst Aıdos Sadyqovty áldebireýler kóliginde atyp ketken bolatyn. 

Ol qazir aýrýhanada jatyr, jaǵdaıy aýyr.