Prezıdent KIA kólikterin shyǵaratyn zaýyttyń qurylysymen tanysty
Prezıdentke qurylys jumystary byltyr qazan aıynda bastalǵany týraly baıandaldy. Josparǵa sáıkes, konveıerden alǵashqy kólik synaq rejıminde kelesi jyldyń shilde aıynda shyǵarylady.
KIA Qazaqstan bas dırektory Kım De Kı zaýyt 2025 jyldyń qazan aıynda iske qosylatynyn jetkizdi. Avtokásiporyn bastapqy kezeńde Sorento modelin shyǵarýdy josparlap otyr. 2026 jyldyń qańtar aıynan bastap jańartylǵan Sportage modeli qurastyrylady.
Prezıdentke KIA zaýyty jylyna 70 myńǵa jýyq avtokólik shyǵara alatyny jóninde málimet berildi.
Kásiporynda jańadan 1500 turaqty jumys orny ashylady.
Munda óndiristiń tıimdiligin arttyrýǵa ári ekologııalyq turǵydan zııansyz etýge baǵyttalǵan tehnologııalyq sheshimder qoldanylady.
Avtomattandyrylǵan zamanaýı kásiporynnyń dánekerleý jelisinde, avtokólikti boıaý jáne qurastyrý jumystaryna 70 robot paıdalanylady.
Jobanyń quny 200 mıllıon dollardy quraıdy, onyń 80 paıyzǵa jýyǵy tikeleı sheteldik ınvestıtsııanyń úlesinde.
Sonymen qatar Qasym-Jomart Toqaevqa jańa zaýyttyń janynan qosalqy bólshekter óndirisiniń klasterin qurý jobasy tanystyryldy. Búginde Lokalızatsııa ortalyǵynyń qurylysy bastalǵan. KIA kompanııasy avtokólik komponentteri men qosalqy bólshekterin óndirýshi jahandyq kompanııalardy tartý boıynsha jumys júrgizip jatyr.
KSS Corporation kompanııasy avtokólik komponentteri bóliminiń basqarýshysy Pak Seıon men Seoyon Ehwa Global kompanııasy jahandyq bıznesti basqarý tobynyń jetekshisi Chang Seokvon Ońtústik Koreıanyń óndirýshileri Qazaqstanda óz óndirisin ashýǵa ázir ekenin aıtty.