Prezıdent QHA-nyń jańa syılyqtary men ordenin bekitýdi usyndy

ASTANA. QazAqparat – Qazaqstan halqy Assambleıasynyń «Ult birligin nyǵaıtý jolyndaǵy jemisti eńbegi úshin» ordenin bekitý kerek. Bul týraly búgin elordada Qazaqstan halqy Assambleıasynyń sessııasynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Jerimizdegi úndestik pen kelisimdi nyǵaıtýǵa naqty isterimen úles qosyp júrgen azamattardy jan-jaqty yntalandyrý qajet. Qazaqstan halqy Assambleıasynyń eki syılyǵyn bekitýdi usynamyn. Birinshisi – ádebıet pen jýrnalıstıka salasyndaǵy úzdik eńbek úshin. Ekinshisi – mádenıet jáne óner salasyndaǵy úzdik týyndylar úshin. Bul marapattardy jeke avtorlar da, shyǵarmashylyq ujymdardyń alýy mańyzdy bolmaq. Bul rette aqshalaı syılyqtyń mólsheri memlekettik syılyqtan kem bolmaýy tıis», - dedi Qasym-Jomart Toqaev.

Sonymen qatar Prezıdent jańa memlekettik nagradany, ıaǵnı Qazaqstan halqy Assambleıasynyń «Ult birligin nyǵaıtý jolyndaǵy jemisti eńbegi úshin» ordenin bekitý kerek ekenin aıtty.

«Alǵashqy laýreattarǵa bul nagradalardy bıyl qazan aıynda Respýblıka kúnine oraı tabystaýǵa bolady», - dedi Memleket basshysy.

Bul turǵyda Prezıdent elimizdegi beıbitshilik pen kelisimdi saqtaýǵa azamattarymyzdyń qosqan úlesin memlekettik deńgeıde moıyndaý jalpyulttyq birlikti nyǵaıtýǵa qýatty serpin beretinin aıtty.