Prezıdent keńesshisi ShYU sammıti týraly: barlyǵymyzdyń maqsatymyz – órkenıet úndestigin nyǵaıtý

<p>ASTANA. KAZINFORM &ndash; QR Prezıdentiniń keńesshisi Bolat Aqsholaqov ShYU sammıti jáne uıymǵa múshe elder arasynda ǵylym men joǵary bilimdi damytýǵa qatysty oıyn bildirdi.</p>

«Astana qalasy eki kúnnen beri túrli salalar boıynsha syndarly suhbat alańyna aınaldy. Búgin Shanhaı yntymaqtastyq uıymyna múshe elderdiń basshylary men bedeldi sarapshylar bir shańyraqtyń astyna jınaldy. Shyn máninde, bárimizdiń maqsatymyz bir – órkenıet úndestigin ornatý jáne beıbitshilik pen turaqtylyqty nyǵaıtý. Búgingi sımpozıým ShYU múshe elder basshylarynyń qatysýymen ótip jatqan sammıt aıasynda uıymdastyrylyp otyr. Aýqymdy is-sharanyń mańyzy zor, óıtkeni, ShYU-ǵa múshe elderdiń joǵary oqý oryndary bir-birimen tyǵyz qarym-qatynas ornatyp, ǵylym jáne joǵary bilim salasyndaǵy yntymaqtastyqty nyǵaıtý kún tártibinde tur. Qazir damyǵan memleketter ekonomıkalyq áleýetin kóterý úshin joǵary oqý oryndarynyń álemdik deńgeıdegi zertteý ýnıversıtetterine aınaldyrýǵa kúsh salýda», - dedi Bolat Aqsholaqov elordada ótip jatqan «Joǵary bilim berý jáne óndiristi ıntegratsııalaý salasyndaǵy yntymaqtastyq» atty halyqaralyq sımpozıýmda.

Prezıdent keńesshisiniń málimdeýinshe, ShYU múshe elder birlesip ýnıversıtettik ǵylymdy damytýǵa tyrysyp jatyr.

«ShYU quramyndaǵy elderdiń ýnıversıtetteri ózara ǵylymı tájirıbe almasý baǵytyndaǵy jumystardy kúsheıtý qajet. Sonymen qatar ortaq ǵylymı jobalardy qolǵa alǵan jón. Bul irgeli iste ShYU-nyń atqaratyn róli zor», - deıdi ol.

Aıte keteıik, qazir elordadaǵy Astana IT ýnıversıtetinde «Joǵary bilim berý jáne óndiristi ıntegratsııalaý salasyndaǵy yntymaqtastyq» degen ataýmen halyqaralyq sımpozıým ótip jatyr.

Jıyn barysynda «ShYU-ǵa qatysýshy elderdiń joǵary bilim berý salasyndaǵy halyqaralyq yntymaqtastyǵy» kitabynyń tusaýy keser rásimi josparlanyp otyr.

Aıta keteıik, elordadaǵy Táýelsizdik saraıynda Qazaqstan tóraǵalyǵymen Shanhaı yntymaqtastyq uıymynyń sammıti bastaldy.

Qazaqstan Prezıdenti Qasym-Jomart Toqaev ShYU sammıtine kelgen mártebeli meımandardy qarsy alyp, qol alysty. El basshylaryn qarsy alý rásimi aıaqtaldy.

Belarýs ShYU-nyń tolyqqandy múshesi boldy. Shanhaı yntymaqtastyq uıymynyń sammıtinde múshe memleketterdiń basshylary Belarýs Respýblıkasyn Uıym múshelegine qabyldaýǵa qatysty birqatar qujatqa qol qoıdy.

Shanhaı yntymaqtastyq uıymy halyqaralyq qatynas júıesiniń mańyzdy tetigine aınaldy. Bul týraly sammıtte Memleket basshysy Qasym-Jomart Toqaev aıtty.