Prezıdent keńesshisi men Serik Jumanǵarın azyq-túlik máselesin talqylady

ASTANA. QazAqparat – QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın QR Prezıdentiniń ekonomıkalyq máseleler jónindegi keńesshisi Ser Sýma Chakrabartımen ishki naryqty azyq-túlikpen qamtý máselesin talqylady, dep habarlaıdy QazAqparat primeminister.kz saıtyna silteme jasap.

Vıtse-premer mınıstrlik qyzmetiniń ózekti máseleleri týraly, atap aıtqanda, Qazaqstan naryqtaryn azyq-túlik taýarlarymen tolyqtyrý jáne áleýmettik mańyzy bar azyq-túlik taýarlarynyń baǵasyn turaqtandyrý boıynsha qabyldanyp jatqan sharalarǵa toqtaldy.

«Basty mindetimiz – baǵanyń kúrt kóterilýine jol bermeý. Bul baǵyttaǵy jumystardy mınıstrlik ortalyq memlekettik organdarmen jáne ákimdiktermen, taýar óndirýshilermen, bólshek saýda ókilderimen jáne naryqtyń basqa da sýbektilerimen birlesip júrgizip jatyr. Áleýmettik mańyzy bar azyq-túlik taýarlary baǵasynyń qoljetimdiligin qamtamasyz etý boıynsha jumystar belsendi júrgizilip jatyr. «Aınalym shemasy« boıynsha qarjylandyrý tetigi qaıta formattaldy», — dep túsindirdi Serik Jumanǵarın.

Onymen bir mezgilde, mınıstr atap ótkendeı, maýsymaralyq kezeńde Ortalyq Azııa elderinen erte ımporttyq jemis-kókónis ónimderin forvardtyq satyp alýdy uıymdastyrý boıynsha sharalar qolǵa alyndy.

Taǵy bir mańyzdy mindet – taýar balansyn qalyptastyrý protsesin avtomattandyrý boıynsha jumystardy uıymdastyrý. Memleket basshysynyń tapsyrmasymen jyl sońyna deıin ulttyq taýar ótkizý júıesin iske qosý josparlanyp otyr.

Ser Sýma Chakrabartı atalǵan sharalar tıimdi ári ýaqytyly qabyldanǵanyn, sondaı-aq óz óndirisimizdi damytý ishki naryqty áleýmettik mańyzy bar azyq-túlikpen qamtamasyz etýge múmkindik beretinin atap ótti.

Foto: primeminister.kz