Prezıdent qazaqstandyqtarǵa alǵys aıtty

ASTANA. QazAqparat – Memleket basshysy QR Prezıdentin ulyqtaý rásiminde óziniń ómirlik qaǵıdaty qandaı ekenin aıtty, dep habarlaıdy QazAqparat tilshisi.

«Saılaýǵa qatysqan barsha jurtqa rızashylyǵymdy bildiremin. Naýqanǵa atsalysqan qaýymǵa, baıqaýshylar men jýrnalısterge zor alǵys aıtamyn. Prezıdenttikke kandıdattarǵa da qurmetimdi bildiremin. Saılaýda saıası partııalar jáne qoǵamdyq uıymdar mańyzdy sátte judyryqtaı jumyla alatynyn kórsetti. Osy rette, meni prezıdenttikke ortaq kandıdat retinde usynǵan halyq koalıtsııasy múshelerine rahmet aıtqym keledi», - dedi Qasym-Jomart Toaqeva..

Sondaı-aq, Memleket basshysy, búkil Qazaqstan halqynyń aldynda esepti ekenin eske saldy.

«Men ózime daýys bergen azamattardyń ǵana emes, búkil Qazaqstan halqynyń aldynda esep beretin boldym. Qazaqta «Baılyq ne kerek, adaldan jımasań, bılik ne kerek, ádildik qurmasań» degen sóz bar. Bul – buljytpaı ustanatyn ómirlik qaǵıdatym.

Men búgin kók týdy súıip, dana halqymnyń aldynda bas ıdim. Azattyq jolynda qurban bolǵan babalar rýhyna taǵzym ettim. Elimniń arman-muratyna ómir-baqı adal bolýǵa sert berdim. Eshqashan adaldyqtan attamaýǵa jáne el múddesine qııanat jasamaýǵa ant ettim. Ata zańǵa qolymdy qoıyp, onyń ár sózin múltiksiz oryndaımyn. Halqymnyń aldyndaǵy osy antym aldaǵy qyzmetimde men úshin aınymas temirqazyq bolady», - dedi Prezıdent.

Eske salsaq, QR Ortalyq saılaý komıssııasynyń shyǵarǵan qorytyndysy boıynga 20 qarashadaǵy kezekten tys prezıdent saılaýynda kandıdat Qasym-Jomart Toqaev saılaýshylardyń 81,31 paıyz daýysyn jınap, jeńiske jetken bolatyn.

Osyǵan baılanysty Ortalyq saılaý komıssııasy QR Prezıdentiniń ant berý kúnin 26 qarashaǵa belgilegen edi.

Foto: t.me/bort_01