Prezıdent: Qazaqstan tóraǵalyq etken kezeńde UQShU-nyń aldyndaǵy mindetterdiń bári oryndaldy

<p>ASTANA. KAZINFORM &mdash; Memleket basshysy Qasym-Jomart Toqaev elordada Ujymdyq Qaýipsizdik týraly shart uıymy Ujymdyq qaýipsizdik keńesiniń kezekti sessııasyn ashyq dep jarııalady.&nbsp;</p>

«Tutastaı alǵanda, Qazaqstan uıymǵa tóraǵalyq etken kezeńde UQShU-nyń aldynda turǵan barlyq mindetter oryndaldy. Basym baǵyttardy iske asyrýda kórsetken qoldaýlaryńyz úshin jáne birlesken jemisti jumystaryńyz úshin úlken rızashylyǵymyzdy bildiremin. 
Qurmetti áriptester, qymbatty dostar! Búgin biz halyqaralyq arenadaǵy jáne óńirdegi ahýal týraly pikir almasyp, onyń UQShU-ǵa múshe memleketterdiń qaýipsizdigine áserin baǵalaýymyz kerek», — dedi Qasym-Jomart Toqaev.

Prezıdenttiń aıtýynsha, búgingi sessııada uıymǵa Qazaqstan tóraǵalyq etken kezeńde atqarylǵan jumystar qorytyndylanady.

«Sondaı-aq, biz UQShU aıasyndaǵy yntymaqtastyqtyń keń aýqymdy baǵyttarynda atqarylǵan jumys týraly málimetti tyńdap, ótken kezeńdegi qyzmetti qorytyndylaımyz. Tóraǵalyq etýshiniń quqyǵyn paıdalana otyryp Ujymdyq qaýipsizdik týraly shart uıymy Ujymdyq Qaýipsizdik Keńesiniń kezekti sessııasyn ashyq dep jarııalaýǵa ruqsat etińizder», — dedi Memleket basshysy.

Aıta keteıik, atalmysh jıynǵa Qazaqstan prezıdenti Qasym-Jomart Toqaev, Belarýs prezıdenti Aleksandr Lýkashenko, Qyrǵyzstan prezıdenti Sadyr Japarov, Tájikstan prezıdenti Emomalı Rahmon jáne Reseı prezıdenti Vladımır Pýtın UQShU bas hatshysy Imanǵalı Tasmaǵanbetov qatysyp otyr.

Sondaı-aq, is-sharaǵa TMD Bas Hatshysy Sergeı Lebedev pen ShYU Bas hatshysy Chjan Mın shaqyrtý alǵan.