Prezıdent «Qazaqstan temir joly» UK» AQ basqarma tóraǵasy Nurlan Saýranbaevty qabyldady
«QTJ» UK» AQ basqarma tóraǵasynyń aıtýynsha, negizgi óndiristik kórsetkishterde ósimniń oń qarqyny saqtalyp otyr. Eksplýatatsııalyq júk aınalymy 272 mıllıard tonna-shaqyrymdy qurady. Qazaqstan-Qytaı túıispeleri arqyly 32 mıllıon tonna júk tasymaldandy. Bul – rekordtyq ári 2023 jylmen salystyrǵanda 13,1 paıyzǵa artyq kórsetkish. Konteınerlik tranzıt 8,8 paıyzǵa ósti. Tasymaldanǵan konteınerler sany 1,4 mıllıon jıyrma puttyq ekvıvalentti qurady.
Prezıdentke iri ınfraqurylymdyq jobalardyń iske asyrylý barysy jáne tranzıt áleýetin damytý jóninde bergen tapsyrmalarynyń oryndalýy jaıynda baıandaldy. Nurlan Saýranbaevtyń aıtýynsha, 2800 shaqyrymnan astam temir jolǵa jóndeý jumystary júrgizilgen. Dostyq – Moıynty, Darbaza – Maqtaaral baǵyttarynda jáne Almaty torabynyń aınalma jolynda 1000 shaqyrymnan astam jańa jeli salynyp jatyr. Dostyq – Moıynty ýchaskesi jáne Jetigen – Qazybek-bek aınalma jelisiniń ekinshi joldaryn salý jumystary kestedegi merziminen buryn, ıaǵnı bıyl aıaqtalady.
Memleket basshysyna qazaqstandyq dálizderge júk aǵyndaryn tartý úshin termınal jelisiniń keńeıip jatqany týraly málimet berildi. Sıan qalasynyń qurǵaq portynda Qazaqstan-Qytaı termınaly iske qosyldy. Bul Transkaspıı baǵyty arqyly Qytaıdan keletin tasymaldyń ulǵaıýyna yqpal etti. Almaty qalasynda, Ázerbaıjannyń Alıat teńiz portynda, Majarstan astanasy Býdapesht qalasynda, Máskeý mańyndaǵy Selıatıno kentinde Shyǵys – Batys baǵyty boıynsha termınaldardyń qurylysy bastaldy. Qytaılyq seriktes Lıanıýngan portymen birlesip, Aqtaý portynda konteınerlik hab salý jumystary qolǵa alyndy.
Conymen qatar Memleket basshysy qoldaý bildirgen birqatar jańa jobalar tanystyryldy.
«QTJ» UK» AQ basqarma tóraǵasy Prezıdentke kompanııa ınfraqurylymdy, termınal jelisin damytýǵa jáne tsıfrlyq sheshimderdi engizýge basa nazar aýdaratynyn jetkizdi.
Qasym-Jomart Toqaev osy baǵyttardaǵy jumysty jandandyrýdyń mańyzyn atap ótti. Memleket basshysynyń aıtýynsha, alǵa qoıǵan mindetterdi josparly iske asyrý Qazaqstannyń Eýrazııadaǵy tranzıttik hab retindegi áleýetin nyǵaıtýda aıtarlyqtaı nátıjege qol jetkizýge múmkindik beredi.