Prezıdent: Qazaqstan Saýd Arabııasynyń ınvestorlaryna tústi metaldyń 60 ken ornyn usyna alady

NUR-SULTAN. QazAqparat - Memleket basshysy Qasym-Jomart Toqaev Saýd Arabııasyna resmı sapary aıasynda yntymaqtastyqty keńeıtýdiń meılinshe perspektıvti salalaryn belgilep berdi. Eń aldymen, bul ekijaqty saýda-sattyqqa qatysty, dep habarlaıdy Aqordanyń baspasóz qyzmeti.

Onyń pikirinshe, yntymaqtastyqtyń mol áleýetin ekonomıkanyń naqty sektorynda da paıdalanýǵa bolady.

– Qazaqstan álemde volfram qory boıynsha 1-oryn, ýran men hrom boıynsha 2-oryn alady, al marganets, kúmis, myrysh, qorǵasyn baılyǵy boıynsha alǵashqy bestikke kiredi. Bul qorlardy barlap, zertteý kerek. Qarqyndy damyp kele jatqan Qytaı men Ońtústik Azııa naryǵyna jaqyndyǵymyzdy eskere otyryp, ınvestıtsııa salýǵa, shyn máninde, bul jaqsy múmkindik. Búgin biz barlaý jáne ázirleme jumystary úshin baǵaly jáne tústi metaldyń 60-tan astam ken ornyn usyna alamyz, – dedi Memleket basshysy.

Qazaqstan men Saýd Arabııasynyń munaı hımııasy, atom energetıkasy, jasyl sýtegi óndirisi salalaryn damytý, ǵaryshty zertteý jóninde jáne basqa da baǵyttar boıynsha jospary bar.

– Biz Koroldiktiń Saudi Vision-2030 strategııasy aıasynda óziniń ǵaryshtyq baǵdarlamasyn damytýǵa degen nıetin qoldaımyz. Elderimizdiń ǵarysh keńistigin zertteý jáne beıbit maqsatta paıdalaný salasyndaǵy yntymaqtastyq úshin tıisti quqyqtyq bazasy bar. Qazaqstannyń aeroǵarysh salasyn damytý úshin tájirıbesi de, áleýeti de jetkilikti. Bizdiń kompanııalarymyz osy salalar boıynsha Saýd Arabııasynyń memlekettik jáne jeke kompanııalarymen ózara yntymaqtastyq ornatýǵa daıyn, – dedi Qasym-Jomart Toqaev.