Prezıdent Qazaqstan men Ózbekstan arasyndaǵy temirjol qurylysyn bastaýdy tapsyrdy

NUR-SULTAN. QazAqparat – Óńirlik deńgeıde básekege qabiletti bolyp qalý úshin temirjol tasymaldaryn arttyrý qajet. Bul týraly Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Joldardyń ótkizý qabiletin arttyrý úshin tar jerlerdi keńeıtý kerek. Osyǵan baılanysty Dostyq-Moıynty temirjol ýchaskesiniń ótkizý qabiletin arttyrý kerek jáne elektr energııasyn kóptep engizý qajet», - dedi Qasym-Jomart Toqaev Úkimettiń keńeıtilgen otyrysynda.

Memleket basshysy Transazııalyq temir joldyń Ońtústik dálizin damytý úshin Qazaqstan men Ózbekstan arasynda jańa Darbaza-Maqtaaral jelisin salý mindeti turǵanyn atap ótti.

«Bul asa mańyzdy ıntegratsııalyq joba. Bul bastamalar birneshe jyl boıy talqylanyp keledi. Eger biz óńirlik deńgeıde básekege qabiletti bolyp qalǵymyz kelse, sheshimdi qazir qabyldaýymyz kerek. Úkimet pen «Samuryq-Qazyna» qory osy jobalardy iske asyrýǵa kirisýi tıis», - dedi Qasym-Jomart Toqaev.

Aıta keteıik, Memleket basshysy Qasym-Jomart Toqaevtyń tóraǵalymen Úkimettiń keńeıtilgen otyrysy ótti. Prezıdent sóziniń tolyq mátinin myna siltemeden oqýǵa bolady.