Prezıdent: Qazaqstan halqynyń 3 paıyzy ǵana kedeılik sheginde ómir súrýde

ASTANA. QazAqparat - Eger de 1990 jyldardyń basynda Qazaqstan halqynyń 40 paıyzy kedeılik sheginen asa ómir súrse, qazir elimizde halyqtyń 3 paıyzy ǵana kedeılik jaǵdaıynda ómir súrýde. Bul týraly búgin Astana ekonomıkalyq forýmynda Memleket basshysy Nursultan Nazarbaev málim etti.

«Biz halyq kirisiniń arajigin alystatpaı, kedeılik deńgeıin áldeqaıda azaıttyq. Eger de, 1990 jyldardyń basynda árbir úshinshi qazaqstandyq (40 paıyzy) kedeılik sheginde ómir súrgen bolsa, al, qazir kedeılik sheginde ómir súretin halyqtyń úlesi - 3 paıyz. Ekonomıkamyzdy endi kóterip jatqanda, biz tutyný dúrbeleńine shaldyqpaı, adamı kapıtalǵa ınvestıtsııa saldyq», - dedi N.Nazarbaev.

Memleket basshysy atap ótkendeı, adam kapıtalynan ózge Qazaqstannyń mańyzdy damý baǵyty - ınfraqurylym men ındýstrııalandyrý bolyp otyr. «Qazaqstannyń ındýstrııalyq-ınnovatsııalyq saıasaty, ınfraqurylymǵa ınvestıtsııa quıý saıasaty ornyqty jyldar ishinde qıyn kúnderge qor jınaýǵa múmkindik berdi», - dep atap ótti Prezıdent.