Prezıdent qazaq tiliniń jańa orfografııasy týraly arnaıy eńbek ázirleýdi tapsyrdy

ULYTAÝ. QazAqparat – Ústirt jasalǵan til reformasynyń qajeti joq. Bul týraly Ulytaý oblysynda ótip jatqan Ulttyq quryltaıdyń otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Men Til bilimi ınstıtýtyna qazaq tiliniń jańa orfografııasy týraly arnaıy eńbek ázirleýdi tapsyrdym. Sodan keıin ǵana latyn álipbıine aýysý jóninde aıtýǵa bolady», - dedi Qasym-Jomart Toqaev.

Osy oraıda Prezıdent ústirt jasalǵan til reformasynyń qajeti joq ekenin qadap aıtty.

«Asyǵystyqqa jol bermeýimiz kerek. Tipti, kóshedegi bılbordtar men mınıstrlikterdiń ataýyna qarasaq ta jetkilikti. Tilimiz burmalanyp ketti. Ashyǵyn aıtý kerek, bul qazaq tiliniń tabıǵatyna jat, tipti, tilimizdi mazaq qylý sııaqty kórinedi. Mundaı ústirt jasalǵan til reformasynyń qajeti joq. Bizge naqty reforma kerek. Til –ulttyń jany. Oǵan nemquraıly qaraýǵa múldem bolmaıdy. Sondyqtan biz tilimizdiń mártebesin arttyratyn grafıkany ǵana qabyldaımyz»,- dedi Prezıdent.

Budan buryn habarlanǵandaı, Memleket basshysy latyn álipbıine kóshýde jan-jaqty, tereń taldaý jasap baryp, túbegeıli sheshim qabyldaǵan abzal ekenin aıtty.