Qashaǵanda gaz óńdeý zaýyttaryn salý, telekommýnıkatsııa sektoryna kirý - Qatarlyq kompanııa Prezıdentke óz josparyn tanystyrdy

<p>DOHA. KAZINFORM &ndash; <strong>Qazaqstan Prezıdenti Qatardyń Power International Holding kompanııasynyń ıeleri Mýataz Ál-Haıat pen Ramez Ál-Haıatty qabyldady, dep habarlady Aqordanyń baspasóz qyzmeti.</strong></p>

Kezdesýde ekonomıkanyń túrli sektoryndaǵy ózara tıimdi yntymaqtastyqtyń perspektıvalary talqylandy. Qasym-Jomart Toqaev tabysty seriktestik Qazaqstan men Qatar arasyndaǵy ınvestıtsııalyq yntymaqtastyqtyń qozǵaýshy kúshine aınalǵanyn atap ótti. 

Foto: Aqordanyń baspasóz qyzmeti

Búgin memlekettik sapar aıasynda birqatar mańyzdy ınvestıtsııalyq kelisimderge qol qoıyldy. Osy rette Qatardyń Power International Holding kompanııasy negizgi qatysýshy sanalady.

Mýataz Ál-Haıat pen Ramez Ál-Haıat Prezıdentke Qashaǵanda gaz óńdeý zaýyttaryn, Qyzylorda oblysynda bý-gaz qondyrǵylarynyń tehnologııasyna negizdelgen elektr stantsııasyn salý jospary jóninde málimet berdi. Sondaı-aq jańa kompressor stantsııasyn salýǵa, Beıneý – Bozoı – Shymkent jáne Aqtóbe – Qostanaı gaz qubyrlaryn júrgizýge nıet bildirdi.

Memleket basshysy elimizdiń uzaqmerzimdi energetıkalyq qaýipsizdigin qamtamasyz etetin bul jobalardyń erekshe mańyzǵa ıe ekenin aıtty. Sondaı-aq Power International Holding kompanııasynyń Qazaqstannyń telekommýnıkatsııa sektoryna kirý jónindegi josparyn quptady.