Qasym-Jomart Toqaev Saha Respýblıkasynyń basshysy Aısen Nıkolaevty qabyldady

<p>ASTANA. KAZINFORM &mdash; Qasym-Jomart Toqaev Qazaqstan men Saha (ıAkýtııa) Respýblıkasynyń san qyrly baılanystary qarqyndy damyp kele jatqanyn atap ótti. Ózara taýar aınalymynyń aıtarlyqtaı artýy &ndash; sonyń aıqyn dáleli.</p>

– Biz ózara qarym-qatynas pen yntymaqtastyq perspektıvalaryna zor yqylaspen qaraımyz. Sizdiń Respýblıkańyzǵa, ıakýt halqyna degen qurmetimiz erekshe. Qos halyqqa ortaq dúnıeler kóp. Sizben birge quramynda iskerlik toptar men mádenıet ókilderi bar úlken delegatsııa kelgenin aıryqsha atap ótkim keledi, – dedi Qasym-Jomart Toqaev.

Memleket basshysy Qazaqstanda Saha Respýblıkasynyń kúnderin ótkizý bastamasyn qoldady. Onyń aıasynda mádenı jáne sporttyq sharalar uıymdastyrý, ıAkýtııanyń ınvestıtsııalyq, týrıstik áleýetin tanystyrý josparlanǵan.

Aısen Nıkolaev kórsetken syı-qurmeti úshin Qasym-Jomart Toqaevqa alǵys aıtyp, Saha Respýblıkasy men Qazaqstan arasyndaǵy qarym-qatynastyń jandana túskenin jetkizdi.

Sondaı-aq ol Qazaqstan halqyna qoldaý kórsetip, sý tasqyny saldarynan týyndaǵan barlyq qıyndyqty tezirek eńserýge tilektestik bildirdi.

– Biz Qazaqstanǵa Saha Respýblıkasynyń kúnderin ótkizý maqsatynda keldik. Astana men Almaty qalalarynda mádenı, sporttyq, iskerlik baǵytta kóptegen shara uıymdastyrý josparlanǵan, – dedi Aısen Nıkolaev.

Kezdesý barysynda aýyl sharýashylyǵy, ken óndirý ónerkásibi, tsıfrlandyrý jáne týrızm salalaryndaǵy yntymaqtastyqtyń perspektıvti baǵyttary talqylandy.

Budan bólek, Qazaqstan men Reseı eki eldiń óńiraralyq yqpaldastyǵyn jan-jaqty damytýǵa basa mán beretini atap ótildi.