Prezıdent Qasym-Jomart Toqaev BUU Bas hatshysy Antonıý Gýterrıshpen kelissóz júrgizdi

<p>ASTANA. KAZINFORM &ndash; Kezdesýde Memleket basshysy ShYU-nyń Astana sammıtine qatysýǵa shaqyrýyn qabyl alǵany úshin BUU Bas hatshysyna alǵys aıtty.</p>

Qasym-Jomart Toqaev Antonıý Gýterrıshtiń sapary Qazaqstan men BUU arasyndaǵy jan-jaqty yntymaqtastyqty nyǵaıtýǵa zor múmkindik beretinin atap ótti.

– Sizdiń Astanaǵa saparyńyz jáne ShYU sammıtine qatysýyńyz Qazaqstan men BUU arasyndaǵy tyǵyz qarym-qatynastyń jarqyn belgisi sanalady. Bul bizdiń BUU qyzmetine atsalysyp jatqanymyzdy kórsetedi. Qazirgi kúrdeli jaǵdaıda Qazaqstan jáne men de Memleket basshysy retinde BUU-nyń jumysyn jan-jaqty qoldaımyz, – dedi Prezıdent.

Antonıý Gýterrısh óziniń saparyn BUU-nyń Qazaqstanǵa jáne onyń ShYU tóraǵalyǵyna kórsetken qoldaýy men tileýlestiginiń kórinisi retinde qarastyratynyn málimdedi

– Qazaqstan beıbitshilik jolyndaǵy kúrestiń jarqyn úlgisin kórsetip keledi. Sizdiń elińiz birigý isinde dáneker, sonyń ishinde óte kúrdeli jaǵdaılarda árqashan altyn kópir, beıbitshiliktiń elshisi boldy. Astana kóptegen bitimgerlik bastamalardyń, sonyń ishinde Sırııa boıynsha Astana protsesiniń ortalyǵyna aınaldy. Astana árdaıym beıbitshilik alańy boldy. Qazaqstannyń bedeli zor. Sizder ıadrolyq qarýsyzdaný salasynda kóshbasshy elsizder jáne basqa da kóptegen salada beıbitshilikke beıildi ekenderińizdi tanytyp kelesizder, – dedi Antonıý Gýterrısh.

BUU Bas hatshysy Astananyń Shanhaı yntymaqtastyq uıymyna tóraǵalyǵyn joǵary baǵalady. Antonıý Gýterrısh Qazaqstanda júzege asyrylyp jatqan aýqymdy saıası jáne ekonomıkalyq reformalardy qoldaıtynyn, elimizdiń jahandyq qaýipsizdik pen beıbitshilikti qamtamasyz etý isinde mańyzdy ról atqaratynyn atap ótti.

Sonymen qatar kezdesýde Ortalyq Azııa memleketteri arasyndaǵy aımaqtaǵy kooperatsııany nyǵaıtý máselelerine erekshe nazar aýdaryldy. BUU Bas hatshysy óńirdegi ekonomıkalyq ıntegratsııa úderisine joǵary baǵa berip, onyń jahandyq máselelerdi sheshýdegi áleýeti zor ekenine toqtaldy.

Budan bólek, Qazaqstan men BUU arasyndaǵy kópjaqty yntymaqtastyqtyń basym baǵyttary, sondaı-aq halyqaralyq kún tártibindegi ózekti máseleler talqylandy.

Aıta keteıik, buǵan deıin Antonıý Gýterrısh BUU-nyń Almatydaǵy UN Plaza ǵımaratynda bolǵanyn jazǵanbyz.