Prezıdent: Qarjylyq-ónerkásiptik toptardyń kapıtaldy shetelge jylystatý táýekeli artyp tur

NUR-SULTAN. QazAqparat – Qarjylyq-ónerkásiptik toptardyń kapıtaldy shetelge jylystatý táýekeli artyp tur. Bul týraly QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Kelesi máselege jekeleı nazar aýdarǵym keledi. Tótenshe jaǵdaı rejıminiń engizilýine baılanysty jekelegen qarjylyq-ónerkásiptik toptardyń kapıtaldy shetelge, onyń ishinde jalǵan mámileler jasaý joly arqyly jylystatý táýekeli artyp tur. Biz qazirdiń ózinde jekelegen tulǵalardyń esepshottaryndaǵy qozǵalysyn tirkedik. Sondyqtan da Ulttyq bankke Qarjylyq monıtorıng jáne qarjy naryǵyn retteý agenttigimen birlesip, naqty baqylaýdy qamtamasyz etýdi, barlyq tranzaktsııalar men elden qarajatty negizsiz shyǵarǵan tulǵalardy tekserýdi jáne baqylaýǵa alýdy tapsyramyn», - dedi Májilis otyrysyna beınebaılanys arqyly qatysqan Qazaqstan Prezıdenti.