Prezıdent Qarjy naryǵyn retteý jáne damytý agenttiginiń tóraǵasy Mádına Ábilqasymovany qabyldady
Prezıdentke qarjy naryǵyndaǵy jaǵdaı, ekonomıkanyń naqty sektoryna beriletin kredıt kólemin keńeıtýge jáne halyqtyń tym kóp nesıe alýyn tómendetýge baǵyttalǵan sharalar týraly baıandaldy.
Qasym-Jomart Toqaevqa bank aktsıonerleriniń jaýapkershiligin qatańdatý úshin tólem qabileti tómen bankterdiń jumysyn retteýge jáne memlekettik qoldaýdy shekteýge qatysty zań jobasynyń ázirlenip jatqany jóninde málimet berildi. Memleket tarapynan kórsetilgen qarjylaı qoldaýdy tolyq ótemeıinshe, bank basshylaryna dıvıdendter men bonýstar tóleýge zań júzinde tyıym salatyn ózgeris engizý josparlanyp otyr.
Agenttik tóraǵasy bank sektorynda turaqtylyq jáne barlyq qarjy kórsetkishterinde ósim baıqalatyny týraly aıtty. Jyl basynan beri bankterdiń aktıvteri 4,8 paıyzǵa, ıaǵnı 46,7 trıllıon teńgege deıin ósti. Ekonomıkany kredıtteý 11,5 paıyzǵa nemese 25,4 trıllıon teńgege deıin, sonyń ishinde shaǵyn jáne orta bızneske berilgen kredıtter 9,0 paıyzǵa nemese 6,6 trıllıon teńgege deıin ulǵaıdy.
Prezıdenttiń bıznesti kredıtteýdi yntalandyrý jónindegi tapsyrmasyn júzege asyrý maqsatynda bankterdiń kapıtalyna, ótimdiligi men kepil saıasatyna, sondaı-aq sheteldik enshiles bankterdiń kredıttik belsendiligin arttyrýǵa qatysty jańa prýdentsıaldy sharalar ázirlendi. Sheteldik ınvestorlar elimizdiń bank sektoryna kirýi úshin talaptardy ońtaılandyrý josparlanyp otyr.
Agenttik tsıfrlyq platformalar arqyly stressti aktıvterdi satý, halyqtyń tym kóp nesıe alýyn tómendetý, barlyq mıkrokredıt boıynsha biryńǵaı mólsherleme belgileý, kollektorlyq qyzmetke qoıylatyn talaptardy qatańdatý, qarjylyq alaıaqtyqqa qarsy is-qımyl jónindegi zań jobalaryn ázirlep, Parlamenttiń qaraýyna engizdi.
Memleket basshysyna qadaǵalaý qyzmeti aıasynda júrgizilgen tekserýlerden keıin 29 mıkroqarjy uıymynyń jáne 14 kollektorlyq agenttiktiń qyzmeti toqtatylǵany, olarǵa 90 qadaǵalaý sharasy qoldanylyp, jalpy somasy 105,3 mıllıon teńge bolatyn 338 aıyppul salynǵany jóninde baıandaldy.
Kezdesý sońynda Memleket basshysy Agenttikke qarjy turaqtylyǵyn saqtaý, halyqtyń tym kóp nesıe alýyn tómendetý jáne qarjylyq qyzmet tutynýshylaryn qorǵaýdy kúsheıtý, bıznes sýbektilerin kredıtteý isin yntalandyrý jóninde birqatar mindet júktedi.