Prezıdent: Qarýly kúshterdiń basty mindeti – elimizdiń tutastyǵyn, táýelsizdigin saqtaý

ALMATY OBLYSY. QazAqparat – QR Qarýly kúshteriniń basty mindeti – elimizdiń aýmaqtyq tutastyǵyn, táýelsizdigin jáne azamattarymyzdyń tynyshtyǵyn saqtaý. Bul týraly QR Prezıdenti Qasym-Jomart Toqaev aıtty, dep habarlaıdy QazAqparat.

«QR Qarýly kúshteriniń bitimgershilik bólimshesiniń aldynda sóılegen sózimde zamanaýı aımaqtyq qaqtyǵystardy baǵalaý kezinde BUU Bas Assambleıasy men Qaýipsizdik keńesiniń qararlaryn basshylyqqa alý kerek ekenin aıttym.

Qaqtyǵystar BUU Jarǵysynyń eki qaǵıdaty – memleketterdiń aýmaqtyq tutastyǵy men ulttardyń óz taǵdyryn ózi tańdaý quqyǵy arasyndaǵy qarama-qaıshylyqty aıqyndap berdi. Búginde álem óziniń damý baǵytyn anyqtap aldy, ıaǵnı, memlekettiń terrıtorııalyq tutastyǵyna basymdyq beriledi. QR Qarýly kúshteriniń basty mindeti – elimizdiń aýmaqtyq tutastyǵyn, táýelsizdigin jáne azamattarymyzdyń tynyshtyǵyn saqtaý», - jazdy Prezıdent twitter paraqshasynda.

Eske salsaq, Memleket basshysy Almaty oblysyna jumys saparymen baryp, keshendi bitimgershilik oqý-jattyǵý jıynyna qatysyp, sóz sóıledi. Sondaı-aq, Qasym-Jomart Toqaev qazaqstandyq bitimgershilik daıarlyq oqý ortalyǵyna joǵary baǵa berdi.