Prezıdent: Qarapaıym sharýalar úshin sýbsıdııa alý – qııamettiń qıyny

ASTANA. QazAqparat – Sýbsıdııa berý júıesi óte kúrdeli. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«2019-2021 jyldary ónim óńdeýge berilgen sýbsıdııany alaıyq. Bul qarajattyń teń jartysy sýbsıdııa alam deýshilerdiń 10 paıyzynyń ǵana qolyna tıgen. Sýbsıdııa alǵan keıbir pysyqaılar óndiristi órkendetýdiń ornyna bıýdjet qarjysyn qaltasyna basyp, shalqyp ómir súrgen. Al qarapaıym sharýalar úshin sýbsıdııa alý – qııamettiń qıyny», - dedi Memleket basshysy.

Osy oraıda Prezıdent bul saladaǵy júıe tym kúrdeli ekenin aıtty.

«Onyń ústine, sýbsıdııa berý júıesi óte kúrdeli jáne qajetti málimet kópshilikke qoljetimdi emes. Sýbsıdııa bólýdi retteıtin jańa tsıfrlyq júıe bul túıtkildi sheshe almaı tur. Árıne, birshama jumys atqaryldy. Muny joqqa shyǵarýǵa bolmaıdy. Biraq bul baǵyttaǵy jumysty aıaǵyna deıin jetkizý kerek», - dedi Qasym-Jomart Toqaev.