Prezıdent qańtar oqıǵasy boıynsha ádil sheshim shyǵarý asa mańyzdy ekenin atady – Máýlen Áshimbaev

NUR-SULTAN. QazAqparat – QR Parlamenti Senatynyń tóraǵasy Máýlen Áshimbaev Memleket basshysy bergen jańa suhbat jáne eldegi jaǵdaıǵa qatysty túsinik berdi, dep habarlaıdy QazAqparat tilshisi.

«Prezıdentimizdiń «Qazaqstan» ulttyq telearnasyna bergen suhbatyn kórip shyqtyq. Memleket basshysy suhbat barysynda halqymyzdy mazalaǵan ózekti máselelerge toqtalyp, elimizdiń damýy men bolashaǵy týraly oılaryn bildirdi. Qasym-Jomart Kemeluly qańtar oqıǵasynan keıin elimizde qalyptasqan jaǵdaıǵa keńinen toqtalyp ótti. Qazir qoǵamda ustalǵandarǵa qatysty quqyq buzýshylyq derekteri týraly jıi aıtylyp jatqany belgili. Memleket basshysy bul máseleler boıynsha birneshe ret jıyn ótkizip, naqty tapsyrmalar berdi. Búgingi suhbatynda da azamattarymyzdyń quqyǵyn qorǵaý jáne árbir is boıynsha ádil sheshim shyǵarý asa mańyzdy ekenin atap ótti», - dep jazdy Máýlen Áshimbaev Facebook paraqshasynda.

Senat basshysynyń aıtýynsha, Prezıdent azamattardyń quqyǵyn buzǵandar jazasyz qalmaıtynyn taǵy bir naqtylady.

«Qazirgi tańda elimizde barlyq salada júıeli reformalar júrgizilip keledi. Qasym-Jomart Kemeluly mundaǵy basty maqsat - eldiń ál-aýqatyn arttyrý, ádiletti qoǵam qurý, olıgopolııany joıý, saıası transformatsııa jasaý jáne elimizdiń ekonomıkalyq damýyn jedeldetý ekenine basa mán berdi. Bul – halyqtyń talap-tilegi», - deıdi ol.

Sondaı-aq, tóraǵa elde bolǵan jappaı tártipsizdikterden keıin sátti reformalardyń qarqyny arta túsetinine senim bildirdi.

«Memleket basshysy tóńkerisshiler osy reformalarǵa kedergi keltirip, elimizdiń irgesine syzat túsirýdi kózdegenin aıttyldy. Mundaı qıyndyqtar reformalardy shekteýge emes, kerisinshe olardy qarqyndy júrgizýge sebep bolady dep senemiz. Suhbattan Prezıdentimizdiń osyndaı qaǵıdaǵa arqa súıep otyrǵanyn baıqaý qıyn emes», - dedi M. Áshimbaev.