Prezıdent «Taza Qazaqstan» ekologııalyq aktsııasyna qatysty
Prezıdentpen birge senbilikke volonterler, «Assambleıa jastary» uıymynyń ókilderi, elimizdiń ǵylym, kreatıvti ındýstrııa, mádenıet, sport salalaryndaǵy belsendi jastar jáne aldaǵy V Dúnıejúzilik kóshpendiler oıyndaryna qatysýshylar, Prezıdenttik jastar kadr rezerviniń músheleri atsalysyp, jóke aǵashynyń 430 túp kóshetin ekti.
Senbilik barysynda Qasym-Jomart Toqaev jastarmen áńgimelesti. Prezıdent qoǵamda ekologııa mádenıetin qalyptastyrý, tabıǵatty aıalaý mańyzdy ekenin atap ótti.
– Shyn máninde, elimizdi kógaldandyrý, abattandyrý – úlken memlekettik mańyzy bar is. Bul búgin shyǵyp, erteń umytyp ketetin birrettik naýqan emes. Atalǵan jumys turaqty túrde júrgiziledi. Týǵan jerimizdi taza ustaýymyz kerek. Bul – jalpyulttyq másele. Qazaqstanymyz taza bolýy qajet. Las elge qonaq retinde, ınvestor retinde eshkim kelmeıdi. Biraq, eń aldymen, Qazaqstannyń taza, kórikti bolǵany biz úshin, ıaǵnı halyq úshin kerek. Bul kúndelikti ómir saltyna aınalýy qajet. Sondaı-aq bul jumys elorda jáne iri qalalarda ǵana emes, shaǵyn qalalarda, aýdandar men aýyldarda da udaıy uıymdastyrylady. Búkil Qazaqstandy taza ustaý ózimizge, jastarǵa baılanysty. Men jastarǵa senemin. Sondyqtan jastarǵa zor úmitpen qaraımyn, – dedi Memleket basshysy.
Prezıdent zań men tártip ústemdigi bárine qatysty ekenin aıtyp, vandalızmmen batyl túrde kúresý qajet ekenine nazar aýdardy.
– Biz óz elimizdi maqtan tutýǵa tıispiz. Meıli ol kóshe, aýla nemese úılerdiń kireberisi bolsyn, bárine uqypty qaraýymyz qajet. Vandaldarmen tabandy túrde kúresý kerek. Sondaı-aq olardyń zań júzinde qatań jazalanatynyn aıttym. Ár nárseniń shegi bar. Áıtpese, bárin búldirip alyp, keıinnen keshirim suraıdy. Elimizde tártip bolýy kerek. Zańdy saqtaý qajet, – dedi Qasym-Jomart Toqaev.
Budan keıin Memleket basshysy Botanıkalyq baqty aralap, jalpyqalalyq senbilikke qatysyp jatqan turǵyndarǵa, elordanyń kommýnaldyq sharýashylyq mekemeleriniń qyzmetkerlerine rızashylyǵyn bildirdi.
Buǵan deıin Memleket basshysy «Qazaqstan Respýblıkasynyń memlekettik nagradalary týraly» Qazaqstan Respýblıkasynyń Zańyna ózgerister men tolyqtyrý engizý týraly» Qazaqstan Respýblıkasynyń Zańyna qol qoıǵanyn jazǵan bolatynbyz.