Prezıdent Іs basqarmasynyń qyzmettik jataqhanasynda 538 adam turady
Bul jaıynda Prezıdenttiń Іs basqarýshysy Aıbek Dádebaev málim etti.
«Búgin QR Prezıdenti is basqarmasy Ákimshilik ǵımarattar dırektsııasynyń úsh jataqhanasyna baryp, ǵımarattardyń jaı-kúıimen tanystym. Uzyn-yrǵasy 160 páter. Bul qyzmettik baspanalar qalanyń ár tusynda ornalasqan: Qajymuqan Muńaıtpasov, Maǵjan Jumabaev kóshelerinde jáne Baýyrjan Momyshuly dańǵylynda. Áriptesterimizben birge ǵımarattardyń ınjenerlik kommýnıkatsııalyq ahýalyn kórip, qanshalyqty jóndeý qajet ekenin shamaladyq. Sonymen qatar turǵyndarmen de júzdesip, usynys-pikirlerin tyńdadyq. Ásirese 25 jyl buryn paıdalanýǵa berilgen eki jataqhananyń jaǵdaıyn jiti talqylaýǵa týra keldi. Atalǵan ǵımarattarǵa keshendi zertteý júrgizý, onyń nátıjesi boıynsha qajet bolǵan jaǵdaıda kúrdeli jóndeýge jobalyq-smetalyq qujattama ázirleý týraly sheshim qabyldandy. Al, oǵan deıin jyldaǵydaı jamap-jasqala turady» dep jazdy Telegram paraqshasynda Prezıdenttiń Іs basqarýshysy Aıbek Dádebaev.
Onyń aıtýynsha, bul jataqhanalar tek QR Prezıdenti is basqarmasyna qarasty mekemelerde jumys isteıtin qyzmetkerlerge arnalaǵan.
Mundaı páterge qol jetkizý úshin baspanaǵa muqtaj qyzmetkerler kezekke turýy tıis.
Áleýmettik qoldaýǵa muqtaj qyzmetkerlerge kezekke turý kúnine sáıkes basym quqyq beriledi. Jalǵa alýshylarmen kelisimshart bir jylǵa jasalady.
Ol izin ala uzartylýy múmkin. Degenmen bul úılerde turýdyń shegi bar. Jaldaý aqysynyń naryqtaǵy baǵamen salystyrǵanda arzan ekenin eskersek, bul - otbasy bıýdjetiniń únemdelýine aıtarlyqtaı kómek.
Demek, qyzmetkerlerdiń jeke úı satyp alý úshin aqsha jınaýyna múmkindik týady. Bul jerde aıta ketetin bir másele, jataqhanadaǵy páterler jekeshelendirilmeıdi.
«Qazirgi ýaqytta úsh jataqhanada 538 turǵyn bar. Barlyǵy da - bizdiń qyzmetkerlerimiz ben olardyń otbasy. Jaqynda birneshe páter bosady. Sebep-saldary ártúrli: keıbiri bizben eńbek kelisimshartyn toqtatty, keıbiri jeke úı satyp aldy. Aıta ketý kerek, úıli bolǵan qyzmetkerlerdiń kóbisi bizdiń mekemelerdiń materıaldyq kómegin paıdalandy. Sonymen birge aýdıt júrgizilip, nátıjesinde keıbir turǵyndar páterlerde negizsiz turyp jatqandyǵy anyqtaldy. Álbette, olar baspanany bosatty. Sonyń arqasynda 2008 jyldan beri kezekte turǵan qyzmetkerler de jataqhanadan endi oryn alyp otyr. Dál qazirgi ýaqytta jańa turǵyndardy qonystandyrý qareketi júrip jatyr. Osylaısha jataqhanaǵa 24 otbasy ornalasady» dep jazady Aıbek Dádebaev.
Іs basqarýshynyń sózine qaraǵanda, onyń basym bóligi - áleýmettik kómekke muqtaj jandar, arasynda 12 otbasy - kópbalaly.
Buǵan qosa tolyq emes otbasylar men múgedektigi bar bala asyrap otyrǵan otbasylar bar.
Qazirgi ýaqytta jumys orny boıynsha baspana kezeginde 1103 qyzmetker tursa, onyń ishinde 120 qyzmetker jataqhana kezeginde tur.