Prezıdent Іs Basqarmasynyń tsıfrlyq transformatsııasy qalaı júrip jatyr

ASTANA. QazAqparat - Prezıdent Іs Basqarmasyn tsıfrlandyrýdyń biryńǵaı arhıtektýrasy ázirlendi. Bul joba 2024 jyldyń sońyna qaraı aıaqtalýǵa tıis. Bul jaıynda QR Prezıdentiniń Іs Basqarýshysy Aıbek Dádebaev aıtyp berdi, dep habarlaıdy QazAqparat.

«QR Prezıdenti Іs Basqarmasynyń tsıfrlyq transformatsııasy týraly aıtýdyń sáti túsip turǵan sekildi. Bul sharýa byltyr bastalǵan edi. Ony «QR PІB júıesin tsıfrlandyrýdyń biryńǵaı arhıtektýrasy» dep atadyq. Joba-jospar 2024 jyldyń sońyna qaraı aıaqtalýǵa tıis. Osy ýaqyt aralyǵynda aqparattyq qaýipsizdikti nyǵaıtyp, qoldanystaǵy IT ınfraqurylymdy jetildirip, júıege zamanaýı aqparattyq jáne saraptamalyq quraldar men qondyrǵylardy engizý kózdelgen. Bıyldyń ózinde bizdegi ınjenerlik-tehnıkalyq ortalyqtyń IT mamandaryn qyrýar jumys kútip tur»,-dep jazdy Aıbek Dádebaev Telegram arnasynda.

Birinshiden – «Býrabaı Damý» týrıstik nysandaryna kelýshiler úshin banktik kartalarǵa beıimdelgen tólem júıesin engizý qolǵa alynǵan.

Ekinshiden – Ortalyq klınıkalyq aýrýhana men «Oqjetpes» shıpajaıynyń bazasynda Biryńǵaı medıtsınalyq aqparattyq júıeni iske qossaq, olardyń jumysy aıtarlyqtaı jeńildeıdi.

Úshinshiden – «Jaǵdaıattyq-saraptamalyq keshen» basqarý jobasy boıynsha kásiporynnyń jáne qyzmetkerlerdiń biryńǵaı tsıfrlyq profılin ázirleý josparda bar.

Buǵan qosa PІB qarasty taǵy 4 vedomstvolyq mekeme ótken jyly ázirlengen Biryńǵaı derekter qory men Biryńǵaı kadrlyq júıeni engizýge tıis.

«Aıta keterligi, sońǵy joba – «noý-haý» jáne ázirleýshilerdiń úlken jetistigi. Bul júıe personaldy basqarýǵa arnalǵan 30 túrli esep-qısapty derbes jasaı alady, jalaqyny esepteıdi, kórsetilgen parametrler boıynsha derbes kadrlardy tańdaıdy, kadrlyq rezervti qalyptastyrady, tipti mamandardy oqytý josparyn da daıyndaıdy. Jobanyń qyr-syry týraly uzaq áńgimeleýge týra keledi. Sondyqtan oǵan keıinirek arnaıy toqtala jatarmyz. Sonymen qatar bıyl bizdegi mekemelerdiń tsıfrlyq resýrstardy paıdalanýyna qaıta júıeli taldaý júrgizý, jobalardy pysyqtaý jáne QR PІB 2023-2025 jyldarǵa arnalǵan tsıfrlyq transformatsııalaý boıynsha jol kartasyn daıyndaý josparlanyp otyr. Basty maqsat – kásiporyndardyń basqarý protsesterin júıeleý, birizdendirý jáne barynsha qolaıly jáne isti jarııa túrde júrgizý», - deıdi Prezıdent Іs Basqarýshysy.