Prezıdent iri munaı-gaz jobalary boıynsha ýaǵdalastyqtardyń ýaqtyly iske asyrylýyna nazar aýdardy

NUR-SULTAN. QazAqparat – QR Prezıdentiniń janyndaǵy Sheteldik ınvestorlar keńesine múshe munaı-gaz kompanııalary basshylarynyń jumys kezdesýinde Qasym-Jomart Toqaev iri munaı-gaz jobalary boıynsha jasalǵan ýaǵdalastyqtardyń ýaqtyly iske asyrylýyna nazar aýdardy, dep habarlaıdy QazAqparat.

Prezıdent Úkimet pen ınvestorlardyń túsinistikke kelgenin, endi osy kelisimderdi tolyqtaı júzege asyrýdy qamtamasyz etýdiń jáne jedel sheshim qabyldaýdyń mańyzdylyǵyn atap ótti.

– Pandemııaǵa qaramastan Teńiz kenishin keńeıtý jobasy kestege sáıkes iske asyp jatyr. Qarashyǵanaq ken ornyn keńeıtý jobasy boıynsha túpkilikti ınvestıtsııalyq sheshimniń qabyldanýy – júıeli jumystyń taǵy bir mysaly. Qazirgi ýaqytta biz Qashaǵandy damytýdyń aýqymdy josparynyń qabyldanýyn kútip otyrmyz, – dedi Qasym-Jomart Toqaev.

Jıyn barysynda elimizdiń munaı-gaz sektoryn damytý jáne onyń ınvestıtsııalyq tartymdylyǵyn arttyrý máseleleri qarastyryldy.

Onlaın formattaǵy kezdesýge Royal Dutch Shell plc kontserniniń bas atqarýshy dırektory Ben van Berden, Chevron korporatsııasynyń óndirý máseleleri jónindegi vıtse-prezıdenti Djeıms Djonson, CNPC korporatsııasynyń vıtse-prezıdenti Hýan ıÝn Chjan, Eni S.p.A kompanııasynyń upstream bıznes jónindegi dırektory Gýıdo Brýsko, ExxonMobil Global Projects kompanııasynyń prezıdenti Nıl Daffın, Total E&P kompanııasynyń Kaspıı jáne Ońtústik Eýropa jónindegi vıtse-prezıdenti Krıstın Hılı qatysty.