Prezıdent ınflıatsııany tejeý týraly: Úkimettiń áreketi jetkiliksiz bolyp otyr

ASTANA. QazAqparat – Prezıdent Qasym-Jomart Toqaev Úkimettiń keńeıtilgen keńesinde Úkimettiń ınflıatsııany tejeýdegi jumysyn synady, dep habarlaıdy QazAqparat tilshisi.

«Biz azyq-túlik taýarlarynyń baǵasy keıingi 15 jylda bolmaǵan deńgeıde ósip kele jatqanyn kórip otyrmyz. Aqpan aıynda ınflıatsııa 21,3% bolyp, óziniń shyńyna jetti. Jurttyń aı saıyn jumsaıtyn qarjysynyń teń jartysynan kóbi azyq-túlik alýǵa ketedi. Úkimettiń áreketi jetkiliksiz bolyp otyr. Tyıym salý jáne shekteý sharalary ýaqytsha ǵana áser etedi. Mundaı qadamdar qıyndyqtyń betin qaıtarsa da, odan birjola qutylýǵa múmkindik bermeıdi, tipti, máseleni ýshyqtyrady deýge bolady», - dedi Memleket basshysy.

Sondaı-aq, Prezıdent aýyl sharýashylyǵy salasynda da mardymdy damý joq ekenin aıtty.

«Aýyl sharýashylyǵy jáne óndiris salasynyń damýynda naqty nátıje joq. Azyq-túlik ınflıatsııasynyń basty sebebi de – osynda. Elimizde óndiriletin taýardyń kólemi ishki suranysty qamtamasyz etýge jetpeıdi. Importqa táýeldimiz, - dedi Qasym-Jomart Toqaev.

Aıta keteıik, Úkimet úıinde Prezıdent tóraǵalyǵymen eldiń áleýmettik-ekonomıkalyq damý máseleleri jóninde keńes ótip jatyr.