Prezıdent ındýstrııalandyrýdyń úshinshi besjyldyǵy mindetterin atady

NUR-SULTAN. QazAqparat – Búgin QR Prezıdentiniń «Altyn sapa» syılyǵyn tapsyrý rásiminde Memleket basshysy Qasym-Jomart Toqaev ındýstrııalandrýdyń úshinshi besjyldyǵynyń mindetterin atady, dep habarlaıdy QazAqparat tilshisi.

«2020 jyldan bastap Indýstrııalandyrýdyń úshinshi baǵdarlamasyn júzege asyrý bastalady. Biz jeke sektordyń áleýetin barynsha paıdalaný arqyly eksportqa baǵdarlanǵan óńdeý ónerkásibin damytý baǵytyn aıqyndadyq. Indýstrııalandyrýdyń úshinshi besjyldyǵyn júzege asyrýda buǵan deıingi besjyldyqtaǵy kemshilikter eskerilýi, naqty óńdeý ónerkásibi qurylýy tıis jáne óńdelgen ónim eksportyn ulǵaıtý, shyǵarylatyn ónimdi tehnologııalyq kúrdelendirý, sapaly jumys oryndaryn qurý mindetterin sheshýi tıis», - dedi Memleket basshysy.

Qazaqstan Prezıdenti memlekettik baǵdarlama ekonomıkanyń qurylymdyq transformatsııasynyń basty faktoryna aınalýy tıistigin basa aıtty.

«Memlekettik baǵdarlama ekonomıkanyń qurylymdyq transformatsııasynyń basty faktoryna aınalýy jáne mýltıplıkatıvti áser kórsetýi tıis. Indýstrıaldyq saıasattyń sońǵy maqsaty – ekonomıkanyń teńgerimdi ósimi jáne azamattardyń ál-aýqatynyń artýy. Bul úshin bizde barlyq múmkindik bar», - dedi Qasym-Jomart Toqaev.