Prezıdent ıdeıasy: Almatyda táýlik boıy jumys isteıtin úshinshi kitaphana ashyldy
Almaty qalasynyń mádenıet basqarmasy málim etkendeı, Almatynyń eki kitaphanasy – Jambyl atyndaǵy qalalyq jasóspirimder kitaphanasy men Alatau Creative Hub ortalyǵynyń kitaphanasy byltyr qyrkúıek aıynan beri oqyrmandardy táýlik boıy qabyldap keledi.
Bul ádisteme oqýshylar, stýdentter, magıstranttar, sondaı-aq doktoranttar arasynda úlken suranysqa ıe.
Osyǵan baılanysty megapolıstiń Abaı dańǵyly, 141 mekenjaıynda ornalasqan taǵy bir kitaphanasy endi 24/7 rejıminde jumys isteıdi.
«Qazir Almatyda úsh kitaphana oqyrmandardy 24 saǵat boıy qabyldaıdy. Kez kelgen adam ózine yńǵaıly ýaqytta kele alady. Jańa jumys formaty engizilgen soń kelýshiler sany da artty.Jalpy almatylyqtar kitap oqyǵandy jaqsy kóredi. Tek qalalyq kitaphanalardaǵy kórsetkishterge toqtalsaq, oqyrmandar jyl saıyn kem degende úsh mıllıon ret kelip-ketedi», – dep habarlaıdy Almaty qalasynyń mádenıet basqarmasy.
Eske salaıyq, 2023 jyldyń maýsym aıynda Túrkistanda ótken «Ádiletti Qazaqstan – Adal azamat» ulttyq quryltaıynyń ekinshi otyrysy barysynda Qasym-Jomart Toqaev 24/7 (táýligine 24 saǵat, aptasyna 7 kún) rejımde jumys isteıtin kitaphana qurý ıdeıasyn aıtqan bolatyn.